Malpica celebrará o Día das Letras Galegas cunha completa programación cultural
Actuacións musicais, poesía recitada e obradoiros amenizarán o municipio nos vindeiros días
Malpica. Sesións de poesía, música ou a presentación das obras gañadoras do certame de poesía erótica Illas Sisargas serán algunhas das actividades da primeira edicion “Malpica nun mar de Letras”.
O programa cultural comeza o venres 14 de maio no que o espectáculo de narración oral e música ‘O exército das paxariñas’ protagonizado por Soraya Lema e Adela Dios recorrerá os centros de ensino –CEIP Milladoiro, CEIP Joaquin Rodriguez e ás escolas unitarias de Barizo e Mens, do CRA A Nosa Señora do Faro – para achegar a figura de Xela Arias, autora homenaxeada nas Letras Galegas 2021, ao alumnado de Infantil e Primaria.
No mesmo día, ás 20.00 horas o fogar do pensionista da Casa do Pescador acollerá a presentación das obras gañadoras das últimas dúas edicións do Certame de poesía erótica Illas Sisargas, ‘Rascamaceiras’ de Laura Ramos Cuba e ‘O cuarto de Jane’ de Charo Pita, da man do colectivo Caldeirón.
As actividades continuará na xornada do domingo 16 de maio, na praza do Campo. Ás 12:00 horas será o momento para as familias acompañadas da rapazada para gozar cos ‘Arrolos con Mamá Cabra’ nos que Gloria Mosquera e Diego Maceiras interpretan e ensinan ás familias participantes neste pequeno obradoiro algúns arrolos cos que adormecer, aleitar, e tamén cos que gozar da música nos primeiros días e meses de vida. Unha hora máis tarde, ás 13:00 horas, será a hora do Vermú das Letras da man do grupo de Malpica Meigallo, da A.C.D Carcaxía. Pola tarde, ás 17:30 horas é o momento do ‘Café con Letras’ no que Atenea García con ‘De ti e mailo mundo que apañes’ fará un percorrido pola obra da poeta Xela Arias. Para finalizar a xornada celebrarase ás 19.20 horas o concerto de Acordeireta, grupo formado por Patricia González e Alejandro Balbuena.
Para finalizar esta primeira edición de Malpica nun mar de Letras, o propio Día das letras, o luns 17 de maio a cita será ás 12:00 horas na praza Villar Amigo onde haberá unha lectura poética aberta para os que se acerquen ao lugar, coa actuación da compañía de A.C. Malante de Malpica.