O concurso de marcapáxinas na Laracha xa ten gañadores
Este venres entregaranse os agasallos correspondentes // Os traballos que obtiveron os primeiros premios serán editados e distribuídos na rede de bibliotecas municipais
A Laracha. Con motivo do Día das Letras Galegas o Concello larachés organizara un concurso de marcapáxinas para os rapaces do municipio con idades comprendidas entre os seis e doce anos. O xurado xa valorou todos os traballos presentados e asignou os premiados.
Alumnado de 1º, 2º e 3º de Primaria:
• 1º premio: Sofía Queijo Rey por “Ler fai voar”.
• 2º premio: Eric Santalla Méndez por “O libro da infancia”.
Alumnado de 4º, 5º e 6º de Primaria:
• 1º premio: Sabela López Bugallo por “Noite de contos”.
• 2º premio: Sabela Fermoso Piccardi por “O meu fantástico libro”.
Os catro galardoados recibirán como agasallo lotes de libros e material didáctico. A entrega farase este venres a partir das 19:30 horas nun acto que se desenvolverá no baixo da biblioteca municipal da Laracha.
A maiores, os traballos que obtiveron o primeiro premio de cada categoría serán editados polo Concello e distribuídos como os marcapáxinas oficiais da rede de bibliotecas municipais.