Outono activo por entornos fluviais para os laracheses maiores de 55
Camiñarán a carón dos ríos Bradoso, Acheiro e o Anllóns e a inscrición, de balde, xa está aberta
A Laracha. O Concello larachés organiza o programa Outono Activo, unha nova iniciativa que inclúe andainas por entornos fluviais do termo municipal e que vai dirixida a persoas maiores de 55 anos de idade.
O propósito é ofrecer a ese colectivo a oportunidade de realizar actividade física ao aire libre e descubrir lugares e paraxes de alto valor natural, paisaxístico e patrimonial pola riqueza etnográfica dos muíños de auga que se atoparán nos roteiros.
A primeira das andainas será o xoves 20 de outubro. Trátase dun percorrido de sete quilómetros e dificultade moderada a carón do río Bradoso, con inicio e fin na escola de Cumiáns. A segunda cita será o xoves 27 de outubro con outra ruta de cinco quilómetros, tamén de dificultade moderada, polo río Acheiro, con inicio e fin no museo dos Muíños de Golmar. Nestes dous casos os participantes sairán en autobús desde a Praza Olonne sur Mer ás 10.00 horas e terán transporte de regreso.
O xoves 3 de novembro realizarase a última das rutas, con protagonismo para o río Anllóns. A saída será ás 10.00 horas desde a Praza Olonne sur Mer, punto ao que retornarán os participantes tras un percorrido de sete quilómetros e dificultade baixa.
A inscrición é gratuíta e vai dirixida en exclusiva a persoas empadroadas na Laracha. Para anotarse é preciso cubrir o formulario a través da web municipal, de xeito presencial no edificio administrativo ou chamando ao 981 612 811. M. Lavandeira