Proxectan unha canle no Muíño do Quinto para desaugar o río Anllóns
Forma parte do plan de prevención, protección e recuperación ante as inundacións na zona
Carballo. A Consellería de Infraestruturas e Mobilidade, a través de Augas de Galicia, vén de adxudicar a redacción do proxecto construtivo dunha canle de desaugadoiro do río Anllóns, na zona de Muíño do Quinto, en Carballo.
O contrato foi adxudicado á empresa Aquática Ingeniería Civil SL por un importe de preto de 18.000 euros. O prazo de execución dos traballos é de seis semanas.
A actuación forma parte do Plan Específico de Xestión do Risco de Inundación (PEGRI) da área de risco potencial de inundación na área fluvial do Anllóns. Mediante este proxecto proponse a construcción dunha canle trapezoidal de entre un e dous metros de profundidade e seis metros de ancho na súa base. O cruzamento da canle co camiño Muíño do Quinto resólvese coa construción dunha obra de drenaxe transversal mediante dous marcos de formigón.
Ademais, no proxecto construtivo, incluirase a restitución da senda peonil existente na marxe esquerda do río, propoñéndose a instalación dunha pasarela peonil de madeira que cruza sobre a canle de desaugadoiro para entroncar coa citada senda peonil, segundo informan dende Augas de Galicia. M. L.