Sentido único para a rúa Silverio Moreda Alvariño da Laracha
O proxecto de transformación contempla ademais melloras nas beirarrúas, accesibilidade e alumeado público
A rúa Silverio Moreda Alvariño, situada no núcleo urbano da Laracha, enlaza dúas vías vertebradoras das comunicacións rodadas como son a Avenida Fisterra (estrada AC-552) e a Avenida de Caión (estrada DP-1913) e actualmente está permitido o dobre sentido de circulación e existen tanto beirarrúas como zonas de aparcamento gratuíto de vehículos a ambas marxes. O Concello, consciente das dificultades que iso implica para a circulación, promove un proxecto que transformará esta céntrica rúa.
A actuación está valorada en 85.500 euros e será executada pola construtora carballesa Vázquez y Reino. O alcalde, José Manuel López, e o responsable da empresa Diego Vázquez, formalizaron o contrato como trámite administrativo previo ao inminente inicio das obras.
Así, na rúa Silverio Moreda Alvariño será establecido o sentido único con entrada pola Avenida Fisterra e saída pola Avenida de Caión, xunto á igrexa parroquial da capital municipal. O proxecto da obra contempla a ampliación das beirarrúas, melloras na accesibilidade e na iluminación pública e a completa sinalización horizontal e vertical en toda a rúa.
Con esta intervención “aumentarase a seguridade viaria tanto para os vehículos para os peóns ao facilitarse a circulación e conservaranse as prazas de estacionamento a ambas marxes da calzada en beneficio tanto das persoas residentes como dos establecementos comerciais situados nesta zona”, afirma o rexedor.