A fadista María do Ceo e Broken Peach animan as festas de Caldas
No marco da celebración patronal Cultura Quente os caldenses desfrutarán de música en vivo da man de Galifunk, a Banda de Padrón, MITIC e tamén Igloo
Caldas encara unha semana máis de verán coa programación cultural baixo o nome do emblemático festival Cultura Quente, que por segundo ano consecutivo se organiza adaptado á situación de nova normalidade. Dende o Concello veñen de informar de que coincidindo coa semana na que deberían ter lugar as Festas Patronais, canceladas no seu formato habitual por mor do Coronavirus (día 15 na parroquia de Santa María e día 16 na de San Roque), o cartel de actividades e música en vivo refórzase nesta ocasión con ata 12 propostas artísticas coas que se busca facer as delicias de caldenses e visitantes, ao tempo que se ofrece proxección e se poñen en valor aos artistas e creacións locais. Os emblemáticos xigantes e cabezudos tampouco van faltar nesta ocasión.
No apartado musical, chega esta semana o grupo Galifunk que actuará mañá, día 13, no marco do programa Cultura no Camiño dentro da programación do Xacobeo 21-22. Ao día seguinte a Banda de Padrón animará a seisión vermú na praza das Palmeiras. O concerto celebrarase a partir das 12.30 horas enmarcado no programa O País das Bandas.
Xa pola noite a Carballeira acollerá un dos pratos fortes coa actuación ás 21.30 de María do Ceo. A artista é unha recoñecida fadista e compositora afincada en Galicia, considerada por moitos como a sucesora de Amalia Rodrigues. O domingo, día 15 MITIC ofrecerá o seu concerto espectáculo á mesma hora e en idéntico escenario.
··· O luns día 16, no marco do programa Cultura no Camiño, chega a Caldas Talabarte que actuará na Carballeira ás 21.30 horas. Esta banda uniu a tres músicos indispensables dentro da escena musical galega: o violín do caldense Quim Farinha, o acordeón de Pedro Pascual e o contrabaixo de Kin García.
··· O martes 17 terán lugar a partir da 21.30 na
Carballeira os concertos de Broken Peach e de Igloo aprazados por chuvia o venres pasado. O primeiro é unha banda de Rock & Soul que destaca pola súa forma de fusionar a música e o espectáculo, intentando darlle un toque persoal a cada tema que interpreta. O segundo é un grupo local de Pop-rock que dende o seu nacemento no 2004 se converteu nunha das bandas revelación do panaroma español.
··· O alcalde, Juan Manuel Rey, anima a desfrutar dos festexos a toda a veciñanza e a manter durante as próximas festas patronais “un espírito festivo”.