Os gandeiros lalinenses pagarán 30 € pola recollida de plásticos
A medida vaise a aplicar a partir do ano 2021 ás granxas con máis de dez vacas
Lalín. As explotacións gandeiras de Lalín con máis de dez vacas abonarán 30 euros ao ano pola recollida de plásticos que fai o Concello. As concellerías de Medio Ambiente e de Agricultura mantiveron unha reunión coas cooperativas agrarias, na que tamén estivo presente a empresa que xestiona a recollida de plástico, na que se analizou a complexidade deste proceso deste residuos de silo agrícolas debido ao encarecemento producido nos últimos tempos.
O concelleiro César Reboredo explicou que “a recollida a nivel europeo deste tipo de residuos tiña como destino os países asiáticos; non obstante a prohibición do goberno chino da importación de residuos provocou un desequilibrio na reciclaxe de plástico, que cuadriplicou o seu custo, pasando de 25 a 100 euros a tonelada métrica”. “Esta circunstancia explicámoslla aos representantes de cooperativas agrarias no dito encontro e dixémoslle que con estes prezos a recollida de plásticos no concello, que supón un custo de 30.000 euros anuais, é inasumible na súa totalidade” sinala.
“Chegamos ao acordo de establecer un suplemento que se comezará a aplicar o vindeiro ano como fórmula para solucionar este grave problema. Este ano desde o Concello faremos a recollida de xeito gratuíta e partir do vindeiro, faranse tres recollidas anuais, nas que cada gandeiro terá que pagar, a partir de 10 vacas (os de menos están exentos), a cantidade de 10 € por recollida (30 €)”, explica Reboredo. s. e.