Nacen axudas para integrar as vivendas na paisaxe do rural

A pandemia converteu as vivendas en algo moito máis que o lugar no que habitamos. Son tamén, en moitos casos, a oficina de traballo, o ximnasio ou o punto de reunión social (dentro do permitido). Agora, todos aqueles que precisen darlle un lavado de cara á fachada dos seus inmobles terano moito máis doado grazas á nova orde de axudas que a Consellería de Medio Ambiente anunciou onte durante a visita a unha vivenda de Trazo. Todo un exemplo de propiedade que pode solicitar a subvención para cubrir a fachada de ladrillo.

A titular deste departamento, Ángeles Vázquez, recalcou que é a primeira vez que a Xunta “saca unha liña de integración paisaxística que vai destinada a inmobles e tamén ao peche de fincas”. En concreto, esta subvención vai dirixida a correxir os máis de 300 impactos paisaxísticos nos concellos galegos, e o presuposto é de 1 millón de euros. O DOG publicou onte a primeira convocatoria desta liña, e a partir de hoxe e ata o 31 de maio, os particulares ou comunidades que desexen acollerse á mesma poden presentar a súa solicitude, que cubrirá o 70% do importe global do proxecto de mellora paisaxística, que poderá incluír unha ou varias actuacións . En todo caso, a cantidade máxima que se outorgará serán 3.000 euros, algo a ter en conta en caso de actuacións que sexan moi custosas.

Aos interesados só se lles porá unha condición: a actuación deberá adaptarse aos criterios que fixan a Guía de cores e materiais de Galicia e a Guía de boas prácticas de caracterización e integración paisaxística. Desta forma, aquelas persoas que desexen cambiar un tellado ou mellorar o aspecto da medianeira do seu edificio poden pedir axuda para o tratamento da mesma; no caso de que unha persoa teña a fachada da súa vivenda con ladrillo á vista tamén pode solicitar unha subvención para revistar e pintar, así como para cambiar a tonalidade da pintura e renovar o exterior, seguindo a solución que a Guía de cor propón para a súa contorna.

A titular de Medio Ambiente lembrou asemade que entran nesta nova orde de axudas o acondicionamento e mellora de peches de fincas de gran dimensión, mediante a substitución de muros opacos por cachotería tradicional ou sebes vexetais; ou revestimento de muros de cerramento realizados con bloques de formigón. Ángeles Vázquez convidou “aos concellos, a administración máis próxima aos cidadáns, a colaborar nas xestións e trámites que son da súa competencia, como axilizar as autorizacións de carácter municipal que sexan necesarias para o desenvolvemento deste tipo de actuacións; así como divulgar a información relativa a esta convocatoria entre os posibles beneficiarios”, sinalou. En definitiva, “a paisaxe é un elemento fundamental da calidade de vida das persoas e por iso tamén debe ser o fiel reflexo dun territorio e dun medio ambiente de calidade, así como dunha sociedade moderna consciente da importancia do seu patrimonio natural e cultural”, defendeu a conselleira.

Aqueles que presenten a solicitude deberán acompañala dunha pequena memoria explicativa da actuación, unha reportaxe fotográfica, a factura da actuación, e a xustificación do pago.