2025: o ano do medio ambiente á galega

2025 será un ano crucial para o medio ambiente en Galicia e para a Consellería que dirixo. Porque asumiremos, por fin, a xestión do noso litoral; porque daremos un novo impulso á nosa acción lexislativa, coa primeira norma autonómica sobre o clima e a que simplificará os trámites administrativos ambientais; e porque reforzaremos os nosos argumentos para exercer plenamente as competencias de meteoroloxía.

Non me cansarei de reivindicar que as comunidades somos suficientemente maduras para ocuparnos dos nosos territorios. Esa é a verdadeira cogobernanza. O litoral é un exemplo perfecto. Quen mellor que os galegos para encargarse da súa costa, a máis extensa de España?

Pechamos 2024 co gran sabor de boca de encarrilar, e xa era hora!, o traspaso da súa xestión. Pero estamos en febreiro do 25. Non podemos seguir perdendo o tempo: necesitamos xa os medios (materiais e humanos) e os expedientes e desenvolver a nosa Lei.

Na Xunta enfocámonos unicamente en traballar polos galegos. Non aspiro a facelo sen os paus nas rodas da esquerda e os seus satélites afíns. Pero, polo menos, que o Goberno central deixe de poñernos trabas. O que para eles é un xogo de intereses políticos, para nós é o noso deber como Administración.

Outro tanto sucede cos ríos cando se desbordan ou os encoros cando se baleiran. Dispoñemos de medios punteiros para anticiparnos a episodios extremos e alertar á poboación para lograr o máis importante: coidar vidas humanas. Non ten sentido, no Estado das Autonomías, duplicar esforzos e orzamento. MeteoGalicia e Augas de Galicia xa están vixiantes as 24 horas do día, os 365 días do ano. Non é arrogancia: é a realidade.

Empregaremos a futura Lei do Clima como vehículo normativo para defender a nosa postura. Será unha das normas que levaremos este 2025 ao Parlamento de Galicia para a súa aprobación. A outra, a de administración ambiental simplificada, é fundamental para reducir trámites e cumprir, así, o mandato europeo de eliminar máis emisións contaminantes grazas ás enerxías verdes.

Neste eido, esperamos —aínda que non depende de nós— que este sexa tamén o ano en que a xustiza europea nos dea a razón fronte á insólita marea de paralizacións de proxectos eólicos provocada polo TSXG. E que sirva para acabar, dunha vez por todas, con este absurdo que frea a descarbonización.

Neste 2025 seguiremos ao carón dos concellos para mellorar as redes de saneamento e abastecemento; para protexer a nosa biodiversidade para profundar no fermosismo; e para mellorar as cifras de reciclaxe —coas novidades do aceite e o téxtil—. Só lles pedimos que arrimen o ombro. Do mesmo xeito, ampliaremos as Reservas da Biosfera; acometeremos os plans de conservación de todos os espazos naturais; e seguiremos paliando os estragos que causan o xabaril e o lobo —que o Goberno central debe retirar sen demora do LESRPE—.

Temos moitos retos por diante, pero contamos coa convicción de estar no camiño correcto para que Galicia siga sendo un refuxio climático.