Feijóo explica as novas normas COVID. Minuto a minuto da comparecencia

A intención da Xunta, segundo Núñez Feijóo, é que xa o propio sábado os bares poidan abrir ata as 23.00 horas e os restaurantes ata as 01.00 horas

A preguntas do xornalistas, o presidente da Xunta confirma que están traballando co ocio nocturno para un paquete de medida económicas concretas.

Co grupo de idade de 59 anos para abaixo empregaranse as vacinas de Pfizer e Janssen que, tal e como lembra Núñez Feijóo, son as autorizadas.

Confía o presidente da Xunta en que o Tribunal Superior de Xustiza de Galicia acepte as medidas acordadas no último comité clínico, e as que haberá que adoptar nun futuro en función da evolución da pandemia. Núñez Feijóo é optimista no tocante á resposta do alto tribunal galego.

A Xunta agarda que as novas medidas poidan ser xa publicadas mañá para a súa entrada en vigor ás 00.00 horas do domingo, coincidindo co remate do estado de alarma.

Feijóo insiste en que unha vez remate o estado de alarma, "comeza unha situación xurídica moi complexa, que lamentamos". É unha "situación inédita en España, e na miña opinión, impropia. Trataremos de xestionar a pandemia con seguridade xurídica, motivando todas as decisións para que reciben a aprobación do Tribunal Superior de Xustiza de Galicia. Temos que xestionar como se non houbera virus, en plena pandemia". O presidente apela á responsabilidade dos cidadáns. 

A boa evolución da pandemia nas residencias e nos centros de día, permite tomar medidas menos restrictivas. Deste xeito, nos centros de día que superen o 90% de usuarios vacinados, estes poderán sair a pasear. No caso das residencias, os maiores poderán ir pasar uns días coas familias durante un periodo mínimo de 5 días. Non o poderán facer nos concellos en nivel alto. Á volta realizarase unha PCR. Ademais nas residencias as saídas por semana pasarán de 3 a 5 saídas. Por outra banda, "e despois de máis dun ano sen poder bicarse ou abrazarse nestes centros, permitiremos o contacto físico das visitas".

Amplíanse os horarios da hostalaría. Os bares e cafeterías poderán abrir ata as 23.00 horas e os restaurantes ata as 01.00 horas. Prohíbense as reunións nos domicilios entre non convivintes entre as 01.00 e as 06.00. Esta medida tamén debe ter o visto bo do Tribunal Superior de Xustiza de Galicia.

Elimínase o toque de queda na medianoite do sábado o domingo. Ampliarase ata a medianoite o toque de queda o sábado. Manterase o toque de queda ás 23.00 horas nos concellos coas máximas restricións, que son os mesmos que manteñen o peche perimetral. As dúas medidas deben ser autorizadas polo TSXG.

Desde o domingo Galicia deixa de estar con peche perimetral, polo que calquera persoa de calquera lugar pode vir á comunidade autónoma. Esta apertura pode ter "unha afectación directa na evolución da pandemia". Vaise reforzar o rexistro de viaxeiros, que é obrigatorio, no que deben anotarse as persoas que cheguen a Galicia provintes de lugares con incidencia alta. Faráselles unha proba diagnóstica. Os que cheguen en avión teñen un posto habilitado nos aeroportos.

A Xunta proporá que se manteña o peche perimetral nos concellos coas máximas restricións, 5 nestes momentos: Cambados, Vilanova, Cualedro, Laza e Padrón.

Galicia é a comunidade con menor taxa de positividade, do 2,24, mentres que a media nacional é de 6,7. A evolución da pandemia, di Feijóo, "segue a ser boa". O proceso de apertura gradual "está dando resultados".

Galicia é a cuarta comunidade autónoma con máis poboación vacinada cunha dose, concretamente co 36.4%. Esta semana prevese vacinar a 245.000 persoas. A vindeira semana todos os maiores de 60 terán recibida alomenos unha dose, e comezarase coa poboación de 59 anos para atrás.

Afirma Feijóo que "estamos nunha  nova fase mellor da que había hai meses, pero non pode conducirnos a un optimismo desaforado, senón a unha fundada esperanza".

Unha muller chegada a Galicia procedente de Nueva Delhi está afectada pola variante india, segundo confirma o presidente da Xunta. Sumaríase aos mariñeiros do barco atracado en Vigo. Unha persoa que viaxaba con esta muller, está corentenada. "Temos máis variantes e máis cepas que antes, polo que hai unha incerteza sanitaria latente".

O actual exercicio de responsabilidade non rematou, afirma Feijóo. "Esta fin de semana remata o estado de alarma, pero non a pandemia. O virus segue estando activo e seguimos nunha situación complexa. A cuarta ola que Galicia está evitando ten nunha situación comprometida a boa parte de Europa".

O presidente galego asegura que "a nosa inquedanza é compartida pola maioría dos presidentes autonómicos" e polos xuristas. Lamenta que o Goberno central "volva desoir á maioría" e pareza que agora o estado de alarma, "imprescindible no seu momento, sexa completamente innecesario. A única solución que se ofrece é xudicializar a pandemia, e que sexan os tribunais os que avalen as decisións que haxa que tomar a partir de agora". O Goberno central desenténdese, nin fai nin deixa facer e coloca aos xuíces nunha difícil situación".

Afirma Núñez Feijóo que resulta "difícil entender que non se fixera nada por mudar o marco legal desde que comezou a pandemia". En calquera caso, dixo, Galicia volverá a aceptar a folla de ruta que marca o Goberno. O importante é que os contactos dos positivos por COVID sexan dectados coa maior celeridade posible e "que non se dean pasos atrás". A nova situación legal supón "moitas incertezas". Non se sabe como vai afectar a nova situación aos peches perimetrais nin ao toque de queda.

O presidente da Xunta afirma que a partir do 9 de maio estaremos na mesma situación pero con menos instrumentos. Non cambiará a pandemia, di Alberto Núñez Feijóo, pero si mudarán radicalmente "os instrumentos que as administración imos ter para o control do virus e da pandemia. Na práctica, o novo contexto xurídico retrotraeranos ao principio de todo, como se non tiveramos aprendido nada".