Sanidade fala de “estabilidade” e confía en que o certificado COVID favoreza a mobilidade

Lembra o conselleiro que o certificado dixital galego de vacinación xa está dispoñible na plataforma É-Saúde, e que nos vindeiros días estará tamén na plataforma de Sergas Móbil e en Pass COVID. Un dos seus obxectivos "é que comece a facilitar a mobilidade dos galegos e as galegas".

Segundo os datos aportados por Julio García Comesaña, uns 60.000 galegos menores de 60 anos recibiron xa a primeira dose de AstraZeneca. Supoñen case o 90% de tódalas listaxes de traballadores esenciais. A poboación con idades comprendidas entre os 65 e os 69 anos, o conselleiro confirma que serán vacinados cos viais de AstraZeneca e Janssen, sempre que cheguen as vacinas. Polo momento, non está confirmada a vindeira entrega de AstraZeneca.

O conselleiro de Sanidade explica que nos mercadiños de menos de 150 postos autorizados poderanse colocar o 100% deles, mantendo a distancia de seguridade establecida na norma. Nos que teñen ata 250 postos o aforo será do 75%, e nos de máis de 250 postos, o límite máximo será do 50%.

Feiras de atracións: 50% de aforo nas que se pode estar sentado e 30% nas que hai movemento.

Congresos: pasa de 300 a 500 no interior e no exterio segue o número máximo en 1.000. Se as circunstancias do congreso estiman que se pode ampliar o aforo, sería Saúde Pública a que determinaría se é ou non posible. 

Estas medidas entrarán en vigor ás 00.00 horas do venres 23 de abril.

Segundo explica o conselleiro de Sanidade, a día de onte foran administradas en Galicia un total de 914.462 vacinas, o que supón o 88,7% do total de dose recibidas. Hai xa 232.000 pacientes coa pauta completa. Deles, 130.601 son maiores de 80 anos. Explica García Comesaña que o ritmo de vacinación segue marcado pola chegada de vacinas. Neste sentido, sinalou que para a vindeira semana está prevista a chegada de 140.000 de Pfizer. Hoxe chegarán 8.300 de Janssen, e esta semana serán vacinados 24.000 galegos coa segunda dose de Moderna.

No tocante á situación asistencial, o xerente do Sergas confirma a súa estabilidade. En Atención Primaria están sendo atendidos 2.609 pacientes con COVID. Tanto o 061 como as Urxencias manteñen unha situación de calma. Os circuitos COVID teñen nestes momentos, segundo José Flores, menos do 15 % de ocupación. 

Carmen Durán confirma que hai en Galicia a día de hoxe 240 casos confirmados da variante británica. Ademais hai 24 da sudafricana, 9 deles con secuenciación completa e 15 pendentes de confirmación. Foi notificado 1 caso da variante P2 do Brasil, unha variante nova, e notificados 18 casos da variante brasileña P1, "que é a que todos coñecemos".

Carmen Durán, directora xeral de Saúde Pública, reitera que en Galicia "temos unha situación epidemiolóxica estable cun crecemento lixeiro", que cifrou no 0,8% nos últimos días. En 135 concellos non foi notificado ningún caso nos últimos 14 días, e 175 concellos que non notificaron ningún caso nos últimos 7 días. A  porcentaxe de probas diagnóstica positivas mantense estable, e esta semana está no 2,4%. Síguense fancendo cribados e probas diagnósticas. 

A 7 días e por áreas sanitarias, Pontevedra é a que ten a maior incidencia acumulada con 67, e Ferrol a  ten a menor incidencia con 21,82 casos por 100.000 habitantes. Ningunha ten unha incidencia acumulada por riba dos 70/75 a 7 días, nin por riba dos 150 casos a 14 días.

Por cidades, en Vigo a incidencia acumulada a 7 días é de 83, na Coruña de 61, en Pontevedra de 38, en Lugo de 37, en Ourense de 31, en Ferrol de 26 e en Santiago de 13.

Carmen Durán recoñece a preocupación pola área de Vigo, onde a incidencia acumulada pasou de 194 a 237 esta semana. A 3 días a evolución "tampouco era a desexable: pasou de 59 a 93". A comarca do Salnés, sobre todo O Grove, tamén ten unha evolución preocupante, cunha incidencia acumulada de 532 a 14 días.

Logo da última reunión do comité clínico acordouse o establecemento do nivel máximo de restricións nos concellos do Grove, A Pobra do Caramiñal, Carballedade Valdeorras, e Cualedro. Así mesmo, o comité tamén determinou o nivel alto de restricións nos concellos de Marín, Meaño, Ribadumia, Vilanova de Arousa, Padrenda, Cortegada, O Barco, Rubiá, Lobeira, Muiños, Petín, Meira, Ribeira, e Cambre. Ademais, as medidas do nivel medio rexerán nos concellos de Trabada, Barreiros, Lobios, Cartelle, Cambados, Catoira, Vilagarcía de Arousa, A Illa, Meis, Sanxenxo, Cangas, Gondomar, Ponteareas, Vigo, Boiro, Rianxo, Carral, Muxía, As Pontes de García Rodríguez e Ortigueira. No resto dos concellos galegos estarán vixentes as restricións fixadas no nivel medio baixo. Todas estas medidas entrarán en vigor ás 00,00 horas do vindeiro venres, 23 de abril.

Segundo explica o conselleiro de Sanidade, Galicia ten a día de hoxe unha incidencia acumulada de 90,3 a 14 días, e de 44,9 a 7 días. Julio García Comesaña fala de estabilidade con respecto á media española.