Aval europeo para Carballo polas súas accións ambientais

Carballo entrou no top 10 das cidades europeas de 20.000 a 100.000 habitantes con mellores prácticas ambientais, un maior compromiso co crecemento verde e unha maior promoción da concienciación cidadá en temas medioambientais. Así o avala o oitavo posto que vén de outorgarlle o equipo de 12 expertos europeos encargados de analizar e avaliar as memorias das 18 cidades de todo o continente seleccionadas como candidatas ao premio Folla Verde Europa (Europea Green Leaf).

O Concello carballés acadou moi boas valoracións nalgunhas das seis áreas temáticas, aínda que destaca o cuarto posto na de Residuos e Economía Circular.

Na área de cambio climático e eficiencia enerxética, os expertos avaliaron moi positivamente o feito de que Carballo fose o primeiro concello galego en implantar a tecnoloxía led en todo o alumeado público, acadando un 80% de aforro en consumo; así como os proxectos presentados ao IDAE Carballo sostible: enerxías renovables e eficiencia enerxética dos edificios públicos e Cicl-Ando, que vén de conseguir o máximo financiamento europeo. A adhesión ao Pacto dos Alcaldes e a redacción do Plan de Acción para o Clima e a Enerxía Sostible mereceron unha mención especial.

En canto a mobilidade urbana sostible, as accións mellor valoradas están relacionadas co fomento da mobilidade peonil, a redución da velocidade urbana a 30 Km/hora, as iniciativas para facilitar o aparcamento mediante a zona azul e os convenios con particulares para crear grandes bolsas no centro urbano. Así mesmo, a elaboración da Estratexia para a mellora do espazo público e a mobilidade urbana recibiu moi boa valoración.

As políticas de protección, xestión e sensibilización cara o medio ambiente foron destacadas polos expertos na área de natureza, biodiversidade e uso sostible do territorio, no que subliñan que Carballo “está bendecido por un hábitat costeiro significativo” e poñen en valor a protección da píllara das dunas.

No apartado de calidade do aire e o ruído, os aspectos mellor valorados son as ordenanzas de ruídos e de tráfico. E polo que respecta á auga, os expertos destacan o proxecto Anllóns-Bardoso e a extensión do abastecemento e saneamento a todo o territorio, así como as campañas informativas e de concienciación social.

A área mellor valorada é a de residuos e economía circular, especialmente pola recollida selectiva nas diferentes fraccións, o plan de compostaxe doméstica e as accións de sensibilización cidadá encamiñadas a conseguir unhas rúas libres de cabichas e outros residuos. Ademais, Carballo Limpo é considerado como un exemplo de integración social, laboral e respecto ambiental.