“O acordo de Caballero co Goberno do Estado vulnera a autonomía das entidades locais”

De resultas do acontecido o luns na xunta de goberno da Federación Española de Municipios e Provincias (Femp), na que o voto de calidade do seu presidente, Abel Caballero, deu lugar a un acordo co Goberno central para a confiscación dos remanentes aos concellos, moitos alcaldes manifestaron publicamente a súa decepción polo feito de que, tras anos de consenso nas decisións deste órgano, se rompese ese espírito. Acusan a Caballero de pregarse aos intereses partidistas antes que defender o municipalismo e entenden que a confiscación dos seus remanentes vailles ocasionar a medio prazo un importante problema de liquidez. O alcalde de O Son, Luis Oujo, é un dos máis críticos ca decisión.

En que consiste o acordo?

Basicamente na liberación dos remanentes dos concellos a favor do Estado. Uns recursos de titularidade municipal aos que nos levan anos impoñendo unhas duras condicións e en moitos casos a imposibilidade de utilizalos en beneficio dos nosos veciños, e que son o resultado da xestión municipal. O Goberno aproveita esta situación e a dificultade das entidades locais para apropiarse destes fondos sin que coñezamos a que os van destinar, e a cambio dunha chantaxe, ofrecendo ás entidades que teñen esa dificultade a posibilidade de obter uns fondos para uns destinos que eles tasan, e polo tanto, ao mesmo tempo que se apropian dos fondos dos concellos atentan contra a súa autonomía.

En que se sustentaría un posible recurso de inconstitucionalidade?

Nas condicións que o Estado impón para utilizar os fondos transferidos aos concellos a cambio da totalidade do seu remante. É dicir: se un concello necesita facer algunha actuación que non estea incluída no listado do Goberno, non poderán usar eses fondos. Por tanto, o acordo vulnera a autonomía das entidades locais que recolle a Constitución.

Por que é un mal acordo?

Pois en xeral, porque é unha apropiación dos recursos dos concellos no momento que máis os necesitamos. Somos a administración máis cercana á cidadanía, que está pasando e pasará momentos de dificultades aos que debemos dar resposta. O próximo exercicio prevese que os ingresos das administracións locais se reducirán nun 30 % e non sabemos que vai acontecer ca nosa participación nos tributos do Estado. Neste momento, o Goberno debería pensar en impulsar medidas que flexibilicen a utilización deses recursos por parte dos concellos para compensar esta redución de ingresos en lugar de apropiarse dos mesmos.

Como afectaría a Porto do Son?

Pois a situación do noso municipio é idéntica á do resto. Precisamos dos recursos que son dos nosos veciños e queremos utilizalos para o fin lexítimo de implantar medidas que nos axuden a superar a crise socioeconómida derivada do covid-19 nas nosas respectivas localidades.

Se se plantexa como préstamo voluntario ó Estado, sería aceptable?

O acordo non é aceptable dende o momento en que se parte dunha situación de inferioridade dos concellos, que non poden utilizar os seus remanentes debido ás limitacións legais que temos e que en moitos casos atentan contra a autonomía local. O Estado non pode aproveitarse desta situación para apropiarse deses fondos de forma totalmente inxusta e insolidaria, nun momento no que os concellos van ver mermados os seus recursos e necesitar esos remanentes para facer fronte a unha intensa crise económica e social.

Plantéxase O Son saír da Femp?

De ningunha das maneiras. O feito de que o presidente da Femp chegase a este acordo antepoñendo os intereses partidistas aos dos concellos aos que representa non pode ser motivo para que abandonemos a federación, porque as entidades locais debemos continuar unidas e organizadas. O que creo que debe mudar na entidade é o seu presidente, que traicionou os nosos intereses.

Sopesa O Son unha insumisión?

O Son respectará sempre as normas aprobadas polo Goberno, como non pode ser doutra maneira. Outra cousa é que esteamos en total desacordo, non as compartamos ou non nos parezan xustas. E como é así, faremos valer a nosa voz para defender os intereses dos nosos veciños.