Santiago
+15° C
Actualizado
martes, 04 agosto 2020
02:35
h

Terra Atlántica suma seis novas empresas dos sectores da artesanía, a hostalaría e o turismo e amplía a súa promoción entre os concellos

O GDR Costa da Morte, impulsor da marca territorio, entregou en Vimianzo novo material promocional para reforzar o apoio por parte dos 17 concellos do territorio

A marca territorio Costa da Morte Terra Atlántica vén de sumar seis novas adhesións de empresas, procedentes principalmente dos sectores da artesanía, froito dos encontros realizados o pasado 7 de xullo en Vimianzo e Buño. As empresas que se unen son Obradoiro Cambón, Olería Aparicio e Cerviño. Tamén o fan outras tres empresas do eido da hostalaría e o turismo: Morada da Moa, Dakar & Rock e Casa de Trillo.

Con estas, xa son 42 as empresas adheridas á marca, que continúa traballando para aumentar a súa comunidade de entidades socias. Neste momento, Terra Atlántica conta cunha representación en todo o territorio, pois xa hai empresas asociadas procedentes dos 17 concellos da Costa da Morte.

Entrega de material promocional aos concellos

En paralelo, continúan os esforzos para dotar de maior notoriedade e impacto á marca. Con este obxectivo, o GDR Costa da Morte, impulsor de Terra Atlántica, fixo entrega este xoves na Casa da Cultura de Vimianzo, de novo material promocional aos concellos.

Entre o material destacan os tótems que se distribuirán nas casas consistorais da Costa da Morte, que contribuirán a reforzar a visibilidade da marca e o compromiso das institucións na súa posta en valor.

O presidente do GDR e alcalde de Zas, Manuel Muíño, destacou que este material “é un paso máis no labor que se vén realizando nos últimos meses, con varias actividades de networking, formación e encontros sectoriais co tecido empresarial e social da zona, que procuraron incentivar a participación e aproveitar as sinerxías entre as entidades socias da marca e contribuír deste xeito ao seu maior coñecemento e relevancia”.

31 jul 2020 / 12:54
Noticia marcada para leer más tarde en Tu Correo Gallego
Tema marcado como favorito