Vedra preséntase candidata a ser unha aldea intelixente
A perda de poboación, e o consecuente envellecemento, son os maiores problemas aos que se enfronta o rural. A falta de oportunidades laborais fai que as aldeas sexan moi pouco atractivas para a xente nova, que non dubida en asentar a súa vida nas cidades. O Concello de Vedra é moi consciente desta situación e por iso, unha vez máis, non dubidou en “ser atrevido” (como di o rexedor Carlos Martínez) e artellar estratexias dirixidas a frear a despoboación.
Neste sentido, veñen de presentar a súa candidatura ao proxecto europeo Smart Rural 21: estratexias para pobos de Europa e da España baleira. Trátase dunha iniciativa na que se seleccionarán 17 municipios rurais de toda Europa que recibirán asesoramento e apoio técnico para o desenvolvemento de estratexias intelixentes que solucionen na medida do posible os retos do rural no século XXI. Vedra preséntase coa convicción de estar dotada das “características idóneas para converterse nun pobo intelixente”, sentencia o alcalde ao respecto.
Dito proxecto é unha iniciativa cunha duración de dous anos e medio, coordinada polo Grupo E40, co apoio da Comisión Europea. Nace da falta de oportunidades no mundo rural debido ao éxodo crecente e ao abandono das aldeas, algo que xera un inevitable desabastecemento de bens e servizos, un declive socioeconómico e o envellecemento poboacional.
Deste modo, o seu obxectivo non é outro que promover o desenvolvemento e a implementación de estratexias de smart village en Europa a través do intercambio de coñecementos e un enfoque integral e participativo na planificación. Do mesmo xeito, permitirá obter conclusións e apoiar as futuras intervencións da PAC (Política Agrícola Común) na rede de smart villages resultante. Segundo explican os membros do Grupo E4O, os interesados no Smart Rural 21 tiveron ata o pasado 11 de maio para presentarse, e está dirixido aos pobos que precisan apoio, ideas e inspiración para converterse en territorios intelixentes, con líderes comprometidos, capacidade humana suficiente para levar a cabo a iniciativa e abertos ao intercambio de coñecementos e á cooperación con outras aldeas. Valórase, segundo sinala dito grupo, a capacidade técnica básica, incluída a conectividade de banda ancha, e a existencia de ideas ou proxectos iniciais.
Serán escollidos un total de 17 municipios europeos para recibir asesoramento e apoio técnico. Ata o momento elixíronse cinco pobos situados en Irlanda, Finlandia, Francia, República Checa e Grecia, mentras que os doce restantes iranse seleccionando ao longo deste mes. Os participantes do programa beneficiaranse da orientación de expertos en solucións de smart village, visitas a outros pobos intelixentes, intercambio de coñecementos a través dos eventos da Academia Smart Village e dunha maior visibilidade a nivel europeo.
Por certo que o Grupo E40, coordinador do Smart Rural 21, é unha consultora internacional centrada no desenvolvemento rural, rexional e socioeconómico, cun forte enfoque na participación das partes interesadas, de abaixo cara arriba, nos procesos políticos.
Alcalde de Vedra
O rexedor vedrés considera que este “é o momento para apostar polas novas tecnoloxías no desenvolvemento global do noso municipio en todos os ámbitos e sectores: o comercial, o formativo ou o educativo”, explica. Sempre que estas novas tecnoloxías sexan “unha ferramenta ideal para favorecer o emprendemento no rural, para fixar poboación e para xerar recursos e valores engadidos”, sinala o alcalde.
Cre que “dende logo, son un instrumento clave para garantir o futuro no rural”. Vedra “é un concello atrevido en canto a proxectos europeos se refire, nos cales xa ten experiencia previa, e sendo líderes incluso nalgúns casos. É por iso que seguimos a crer no concepto Europa, querendo ser parte activa e partícipe en alternativas internacionais como este Smart Rural do que nos ilusionaría moito formar parte”, recoñece Carlos Martínez.
E é que hai que lembrar que o municipio vedrés é o líder do proxecto Youthnest.crea, no marco da iniciativa Erasmus+, cuxa finalidade non é outra que fomentar o emprendemento e o autoemprego no rural entre os máis novos. Vedra está ao fronte así dunha rede de traballo transnacional integrada por profesionais de seis entidades de diferentes países da UE (Galicia, Países Baixos, Italia, Reino Unido, Eslovaquia e Portugal). Converténdose nunha Smart Rural, Vedra seguirá abríndose a Europa.
QUE as voces dos pobos sexan escoitadas a nivel rexional, nacional e europeo. Iso é o que se logra coa posta en marcha de proxectos como este. A despoboación no rural é cada vez máis evidente e día a día convértese na maior preocupación dos concellos, que buscan estratexias para lograr que os mozos lle den unha oportunidade ás aldeas. Converterse nun pobo intelixente, como pretende Vedra, é un moi bo camiño para logralo. Hai que pensar que, se o consegue, recibirá durante dous anos e medio asesoramento e apoio técnico e estará en contacto co resto de municipios do programa. Vedra xa lidera o proxecto Youthnest.crea, e de sumarse a este, non fará máis que ir crecendo a nivel europeo pasiño a pasiño.