Un ciclo para gozar dos órganos históricos de Compostela
Concertos, espazos de conversa e cinema mudo con música en directo en Numax para desfrutar do instrumento en Semana Santa
Redacción
Compostela posúe un extraordinario patrimonio de órganos históricos e a Semana Santa é a data elixida para poder gozar deles. O Concello presentou onte a nova edición do ciclo De Lugares e Órganos, que se desenvolverá entre o 31 de marzo e o 8 de abril. Concertos, espazos de conversa, un itinerario musical e a proxección da película de cinema mudo Shoes con música ao vivo na sala NUMAX conforman a programación desta edición.
O órgano “é o gran referente harmónico que existe no noso patrimonio” xa que “forma parte, máis que ningún outro, da historia sonora de Compostela”, salientou onte a concelleira de Acción Cultural, Mercedes Rosón, durante a rolda de prensa para presentar a nova edición do ciclo. A directora artística do programa, Belén Bermejo, explicou que o propósito da programación é “achegar públicos amplos a este descoñecido e ao tempo fascinante instrumento, do que Compostela posúe magníficos elementos exemplarmente restaurados”.
O primeiro dos concertos terá lugar o día 31 de marzo en San Paio de Antealtares, da man do coruñés afincado en Ámsterdam Enrique López-Cortón, cantante, director de grupos vocais e organista, que dirixirá a Capella Sancta Maria, para interpretar un programa de músicas procedentes de mosteiros femininos ou compostas e arranxadas para seren cantadas polas freiras.
O día 2 terá o grupo La Tasteggiata, unha formación integrada por Tobie Miller, Marco Ambrosini e Eva-Maria Rusche, interpretará un programa de música barroca, Notas roubadas, cunha combinación instrumental pouco usual de zanfona, nyckelharpa, órgano portativo e espineta. Será na igrexa do Pazo de San Lourenzo, un espazo no que existe un valioso órgano aínda sen restaurar. O concerto irá precedido dun espazo de peparación para a escoita e conversa cos intérpretes. O día 3 será a quenda do órgano de Santa Clara, no que a organista Eva-María Rusche interpretará un programa integrado por pezas compostas arredor do himno do Page Lingua, xunto a sonatas da chiesa de coñecidos autores. Pechará o ciclo o día 8, na Igrexa da Universidade, Alejandra Escolante, unha das máis prezadas organistas do panorama musical galego, que actuará xunto cos membros do Quinteto InVento.
De Lugares e Órganos ofrece ademais as Matinés 20’ . Terá lugar na mañá do xoves 6 na Igrexa da Universidade da man da compostelá Marta López, profesora de clave do Conservatorio de Pontevedra, que interpretará un repertorio da súa escolla. Con ela poderase falar sobre o seu oficio, experiencia e práctica como organista. O día 5 haberá un roteiro pola cidade, arredor da figura do organeiro Mariano Tafall, no que se percorrerán diferentes fitos relacionados coa biografía.
A programación complétase, na súa sección O órgano sae á rúa, coa proxección, na sala Numax, da película de cinema mudo Shoes, da directora Lois Weber, que será acompañada de música ao vivo interpretada polo guitarrista Rafa Fernández e Alex Salgueiro, ao órgano Hammond.
De balde
As entradas para actividades e concertos son de balde, mais cómpre retirar invitación no despacho de billetes da Zona C., xa desde onte. De non se esgotaren, tamén se poderán recoller o propio día da actividade no lugar onde esta se celebre desde unha hora antes do seu comezo. As entradas para a proxección na Numax poderán recollerse no despacho de billetes do cine ou na web numax.org e teñen un prezo de catro euros.
- Así es el paraíso natural lleno de pozas y cascadas más bonito de Galicia: a menos de una hora de Santiago
- Cien años de historia del colegio de la Inmaculada en Compostela
- Una cardióloga del CHUS recibe el Ramiro Carregal por un novedoso trabajo en insuficiencia mitral
- Nuevo corte de tráfico en Santiago: la calle afectada estará cortada hasta el seis de mayo
- Conxo rescata los mejores recuerdos de los 90 y la tradición de la cabra
- Vía Verde de Santiago a Sigüeiro: comienzan las obras con casi un año de retraso
- El ComposFest 2024 anuncia sus conciertos gratuitos en Santiago
- San Nicolás de Sar: de curtidoiro a centro para persoas sen fogar