A Unidade de Saúde Mental Infanto-Xuvenil, a primeira coa acreditación de calidade

A Unidade de Saúde Mental Infanto-Xuvenil da Área Sanitaria de Santiago e Barbanza, é a primeira da comunidade en obter a acreditación de calidade pola norma ISO 9001:2015. De referencia para doentes de toda Galicia que precisen hospitalización por patoloxía grave, conta tamén con consultas externas e hospital de día.

Convértese tamén nunha das primeiras con esta acreditación, o que segundo a xerente da área sanitaria, Eloína Núñez, supón “un estímulo ao excelente traballo de todos os profesionais que a conforman” esta unidade do CHUS.

Conta con tres dispositivos principais: o de consultas externas, o hospital de día -que atende en formato de tratamento intensivo a pacientes en base a diversos programas (como o de tratamento dos trastornos da conduta alimentaria, de abordaxe de condutas autolesivas ou para tratar o trastorno mental grave)- e o dispositivo de Hospitalización. Este é o único existente en Galicia para o tratamento específico, en réxime de ingreso, de nenos e adolescentes con problemas de saúde mental que o requiran, e leva funcionando máis de dez anos ao longo dos cales atendeu a preto de oitocentos pacientes de toda Galicia en situacións críticas.

El CHUS administrará en breve una terapia subcutánea para el cáncer de mama HER2

O responsable da unidade, José Mazaira considera fundamental “a continua coordinación entre os distintos profesionais de diversas disciplinas (psiquiatría, psicoloxía, enfermería, terapia ocupacional, traballo social..) que integran os equipos, e que están a desenvolver o seu labor cun compromiso e dedicación encomiables”.

Destaca o desenvolvemento e posta en práctica dun cambio esencial no modelo do traballo clínico na unidade, “reorganizando inicialmente a asistencia en consultas externas segundo niveis de gravidade”, e que puxeron en marcha ante o aumento considerable e persistente nas demandas de atención por problemas de saúde mental en mozos.

Segundo o doutor Mazaira, “o aumento adicional da demanda producido a partir da pandemia confirmou esa esixencia e acabou de definir un modelo no que os tres dispositivos principais da unidade (consultas externas, o hospital de día e a área de hospitalización) se organizan e interactúan de forma estreita para proporcionar unha atención ao paciente adecuada en cada momento á maior ou menor gravidade da súa situación clínica e necesidades”.

“A obtención do certificado de calidade implica un recoñecemento explícito a unha organización e un traballo asistencial que cumpre altos criterios de calidade no amplo conxunto de tarefas que conforman o desempeño habitual da unidade compostelá”, dixo.