En xullo comezan as obras da nova Cidade de San Caetano cun orzamento de 34,6 millóns

A conselleira de Infraestruturas e Mobilidade, Ethel Vázquez, reuniuse na mañá de onte coa empresa adxudicataria das obras (Acciona) que se van realizar no solar da antiga Estación de Autobuses. A razón da comparecencia da conselleira era a de anunciar o comezo destas obras para a construción da nova Cidade de San Caetano, o complexo administrativo da Xunta, que conta cun orzamento de 34,6 millóns de euros e cuxos traballos se iniciarán a mediados do mes de xullo.

“Acabamos de asinar o contrato administrativo e debemos comenzar a organización”, explicou a conselleira, engadindo que se trata de poñer en marcha a primeira fase desta obra, composta por dous módulos de edificios con catro andares, nunha superficie útil de 12.000 m², que albergarán sete unidades administrativas nas que se reubicarán uns 700 empregados públicos. Unha construción que supón “un aforro de 1,1 millóns de euros en alugueiros”, recalcou Vázquez, “estamos a falar de dous módulos de edificios que se conectarán cos vestíbulos e tamén co patio central de San Caetano”.

“A solución construtiva máis singular, son as cubertas axardinadas e tamén se utilizarán técnicas de eficiencia enerxética”, explicou a conselleira de Infraestruturas, “empregaremos a xeotermia, para o que temos que realizar sondaxes”. “Queremos conseguir a máxima optimización no deseño, a máxima funcionalidade e a máxima calidade destes novos edificios administrativos”. “A nosa previsión é comezar estas obras a mediados de xullo”, incidiu Vázquez “cun investimento de 34,6 millóns de euros, e comezaremos organizando a caseta de obras, seguridade e saúde”.

Ethel Vázquez tamén explicou que a partir da segunda quincena de xullo desprazaranse as primeiras grúas torre para empezar os traballos e “xa en agosto, iniciaranse os movementos de terra, sondaxes e cimentacións”. “Realizaranse algúns pequenos axustes que para nada afectan ao volume edificatorio, nin ao que se refire á funcionalidade, buscando a calidade do servizo, como a entrada ao aparcamento, que o patio estea máis aberto á avenida de Rodríguez de Viguri, e tamén a entrada coa pérgola”, especificou a conselleira.

Vázquez tamén explicou que a nova Cidade de San Caetano busca unha “maior calidade do servizo público que permitirá incrementar á súa vez calidade de vida dos cidadáns que se despracen até a Administración pública e tamén”, reiterou “un aforro de alugueiros importante”. As obras teñen un prazo de execución de 18 meses e, polo tanto, “a nosa previsión é que acabemos de abordar o inicio das obras a mediados de xullo e rematalas a finais do ano 2024, é o obxectivo que nos marcamos e agardamos que poida ser así”.

Nesta dirección, Ethel Vázquez falou da coordinación das obras que estaba a presentar coas que están a ter lugar na Avenida Rodríguez de Viguri, “están en execución as obras desa avenida e hai que compaxinalas con estas actuacións”, dixo en referencia ao solar da antiga estación. “Rematarán esas obras de Rodríguez de Viguri para ese intercambio intermodal sobre o mes do outubro, pero en calquera caso compaxinadas co inicio destas obras para ofrecer maior funcionalidade e maior integración paisaxística”, recalcou Vázquez.

Sobre a idea de pechar a rúa Ánxel Casal ao tráfico, a vía que separa San Caetano dos novos edificios e que xa se barallara a finais de 2021, cando se procedeu a demoler o antigo edificio e cuxo permiso denegara o anterior goberno municipal, Vázquez só indicou que se deixará a nova negociación para unha segunda fase desta obra que comezará os traballos a mediados de xullo. Ethel Vázquez tamén comentou coa prensa que dende a súa Consellaría “agardamos poder colaborar, coordinar e acordar co Concello de Santiago a segunda fase do que é a cidade de San Caetano” e que finalizará en 2024, “que xa que está contemplada neste contrato de anteproxecto para a praza da Camilo Díaz Valiño e os novos accesos”.

Sobre a necesidade de ampliar a zona de aparcamento para acoller os vehículos deses 700 empregados públicos que traballarán na Cidade de San Caetano, a conselleira de Infraestruturas quixo deixar claro que “non imos incrementar o número de traballadores públicos, senón que queremos que se integren nas mellores condicións a evitar ese custo de 1,1 millóns de euros de alugueiro”. “En calquera caso”, explicou a conselleira Vázquez, “si que nas propias edificacións estamos estudando e analizando unha área para aumentar certo número de prazas de aparcamento”.

A anulación de dous lotes de transporte escolar polo TSXG

Preguntada pola decisión do Tribunal Superior de Xustiza de Galicia (TSXG), que o pasado venres anulaba a adxudicación por parte da Xunta de dous dos lotes de transporte escolar á empresa Monbus, a conselleira de Infraestruturas e Mobilidade indicaba que se trataba dunha cuestión que atinguía á Consellaría de Educación.

Así e todo, Ehtel Vázquez explicou que “en calquera caso, a Xunta de Galicia, como sempre vén facendo co Plan de Transporte Público, cumprimos escrupulosamente a lei e con todo o procedemento administrativo que debemos de cumprir, a Lei de Contratos do Sector Público e as normativas europeas”. “Comprenderán que para licitar tal tipo de contratos hai que realizar un informe técnico”, recalcou a conselleira para engadir que “dende logo, realizamos todos os trámites e os informes xurídicos, e o TACGAL, o Tribunal de Contratos das Administracións Públicas, vén a confirmar practicamente o o cen por cen dos procedementos realizados pola Consellaría de Infraestruturas, e os procedementos contenciosos tamén os gañamos practicamente todos”, finalizou.