O PP esixe explicacións ao BNG polo traslado do orzamento para campos de fútbol a outros gastos

O concelleiro do PP de Santiago, José Ramón de la Fuente, vén de denunciar a modificación do orzamento municipal incoando un expediente de transferencia de crédito para sacar 98.000 € reservados para o mantemento de campos de fútbol na cidade para dedicalos a unha indeterminada necesidade de promoción e outros gastos diversos.

Así, destacou que “Santiago ten unha coñecida carencia de instalacións deportivas e unha moi evidente necesidade de mantemento das existentes, como ten recoñecido a propia concelleira de deportes, polo que non se entende moi ben que os sempre escasos e insuficientes orzamentos que se dedican ao deporte sexan minguados agora para atender outras necesidades que nada teñen que ver con el”.

A situación do Vero Boquete

Neste senso, De la Fuente salientou que “non deixa de ser revelador que se saquen cartos para mantemento de campos de fútbol coñecendo o estado non que se atopa o estadio Vero Boquete de San Lázaro", eludindo ás "deficiencias graves" que ten desde hai anos e que necesitan un plan de actuación "urxente e inaprazable".

Unhas deficiencias graves que, segundo explica, xorden pola falta de mantemento, nas cales destaca o "alarmante deterioro da contorna, que se atopa nun estado lamentable".

"As prioridades dos nacionalistas"

Desta forma, o edil popular lamenta “a falta dun proxecto claro e ambicioso por parte do BNG para o deporte na cidade, ou a nula planificación e a inexistente coordinación cos afectados das escasas actuacións que se pretenden executar”.

Para el, a redución dos orzamento para o deporte deixa claras "as prioridades dos nacionalistas, e entre elas non esta o deporte base; na súa filosofia de xestión da cidade hai cartos para incrementar significativamente o número de asesores ou para multiplicar o número de altos cargos, ou para gastar no Alba de Compostela, pero non hai cartos para o deporte; segundo o BNG, o deporte pode esperar”, finalizou o popular.