Rehabilitación

Derrube ‘controlado’ dun dos muros do parque de Belvís

A infraestrutura estaba abombada por causa dunhas árbores

Muro do parque de Belvís que se vai reparar estes días

Muro do parque de Belvís que se vai reparar estes días / ECG

Quen pasee estes días polo parque de Belvís, cando o tempo o permite, pode atopar cunha sorpresa non agradable de entrada. O muro lateral dunha das escaleiras que sobe cara ao mirador e o Seminario Menor aparece derrubado. A causa non foron as choivas, senón o Plan de consolidación de muros históricos do Concello de Santiago.

A infraestrutura estaba “abombada por causa de dúas robinias e un loureiro que se inclinaban sobre o muro”, comentan fontes municipais. Para protexer o muro o evitar males maiores o servizo de parques e xardíns procedeu á corta destas árbores, que ademais se atopaban danadas, e puxo en marcha unha intervención para consolidar o muro. Ademais da súa recomposición os traballos vanse completar coa eliminación doutros eucaliptos da zona superior, tamén danados. Ademais, dende este mércores, o servizo de xardíns xa procedeu a plantar na mesma área unha serie de árbores froiteiras, menos voluminosas e tamén máis alonxadas do muro que se trata de protexer.