O Concello abre o período de inscrición no Espazo María Miramontes o 26 de agosto

As familias interesadas en obter unha praza no Espazo Educativo e de Lecer María Miramontes poderán facer a solicitude entre o 26 de agosto e o 4 de setembro. As actividades da Ludoteca comezarán o 30 dese mesmo mes. Así o deu a coñecer este luns a concelleira Míriam Louzao en rolda de prensa tras a Xunta de Goberno local na que se deu luz verde ao procedemento de alta e prazos de solicitude de praza e gratuidade da Ludoteca das Fontiñas para o curso 2024-2025.

As persoas que desexen participar deben darse de alta a través dun formulario dispoñible na sede electrónica do Concello onde se indica a documentación que hai que presentar e que é diferente segundo as circunstancias de cada familia. 

O procedemento está aberto durante todo o ano. Pode realizarse tanto presencialmente, no Rexistro Xeral do Concello, como electronicamente. Como novidade, Louzao mencionou que o centro non tramitará altas nos períodos de solicitudes de praza, “polo que convidamos a todas as familias a que se dean de alta canto antes para poder ter todo en orde nos prazos nos que se solicitan os VacaLudos”.

O centro dispón dun total de 73 prazas, das que 20 son para crianzas de 2 a 3 anos; 30 son para nenos e nenas de entre 4 e 6 anos, e as 32 restantes van destinadas a menores de entre 7 e 12 anos. Como requerimento para optar a unha destas prazas, as crianzas teñen que estar empadroadas en Santiago ou ben matriculadas nun centro de ensino compostelán.

Mañá abre o prazo de inscrición no programa de conciliación de VacaLudos Semana Santa do Espazo María Miramontes

Diferénciase o periodo lectivo e o non lectivo (VacaLudos). Dentro do lectivo hai catro modalidades: as tardes con cada quenda por idade; as mañás dos venres “destinadas a actividades programadas cos centros educativos”, os sábados con actividades programadas e os sábados temáticos con aforo limitado.

Tamén se aprobaron os prazos de todas as solicitudes dos VacaLudos. Deste xeito, para VacaLudos Nadal o prazo será do 28 de outubro ao 3 de novembro; para VacaLudos Entroido, do 2 de xaneiro de 2025 ao 8 de xaneiro; para VacaLudos Semana Santa, do 3 ao 9 de febreiro e VacaLudos Verán do 21 ao 27 de abril.

Esta Ludoteca, xestionada pola Escola de tempo libre e animación sociocultural Don Bosco, pretende ser un recurso para facilitar a conciliación. En palabras de Louzao, “o servizo é prioritario para as familias que traballan durante o horario das actividades, polo que pedimos que acrediten esta circunstancia mediante un certificado laboral”.

O programa de conciliación de verán de Santiago pecha o prazo de inscrición o próximo mércores

Nesta mesma sesión da Xunta de Goberno tamén se tomou coñecemento da sinatura do convenio de colaboración entre a asociación para a promoción social e inserción sociolaboral Plataforma polo Emprego e o Concello de Santiago para o ano 2024, que recolle unha achega municipal de 12.000 euros.

Así mesmo, deuse luz verde a tres licenzas particulares: unha para unha obra de acondicionamento dunha vivenda, na rúa de Pitelos, e dúas para arranxo de fachadas en edificios situados na rúa de Arzúa e na avenida Romero Donallo.