A festa da cultura urbana volve á cidade despois de dez anos de ausencia co Compostela Skate

A cultura urbana recupera o 28 de setembro a súa visibilidade na cidade e faino da man do festival Compostela Skate que chega á súa cuarta edición logo de dez anos sen celebrarse. O evento competitivo de skate, break dance e BMX Flatland (acrobacia en bicicleta), entre outras disciplinas, dará comezo ás 16 horas na praza da Constitución, situada detrás do Parlamento galego e prolongarase até as 20 horas. A partir de aí, até as 23 será a quenda dos músicos, coa presenza de Saibran –compoñente de Boyanka Kostova–, Sandra FG, Mahía e André GS –músico que ensaia no Centro Xove da Almáciga–.

Santiago Urban Fest: un espazo para a música e o baile que aposta pola diversidade de voces

O evento presentouno no Pazo de Raxoi a concelleira de Xuventude, María Rozas, xunto aos coordinadores do Compostela Skate: Alberto Muíño e Rubén Varela, coñecido como DJ Mil.

Retómase agora o evento que entre 2010 e 2014 se celebrou en lugares coma o Campus Sur ou a praza do Toural dentro das festas da Ascensión. Segundo a concelleira María Rozas, o Goberno local “fai unha clara aposta por eventos relacionados coa cultura urbana, porque cremos no seu enorme potencial como ferramenta de transmisión de valores e de xeración de comunidade”.

E decídese situalo na praza da Constitución xa que conta cunhas instalacións creadas para a práctica do skate e punto de encontro da mocidade que practica esta e outras disciplinas deportivas urbanas. Rozas asegurou que “a xornada vai ser todo un espectáculo” e convidou á veciñanza a asistir xa que “tamén pretendemos que se coñezan mellor estas disciplinas artísticas e deportivas, que acaban de chegar mesmo aos Xogos Olímpicos de París”.

Alberto Muíño salientou que o Compostela Skate traerá a Santiago “a grandes deportistas en disciplinas como o skate, o breakdance ou o street breakdance, que demostrarán a súa valentía e as súas habilidades nun evento que vai ser unha experiencia única”. Tal e como explicou, haberá competición nesas modalidades, para as que xa están abertas as inscricións, e tamén exhibicións doutras disciplinas como BMX Flatland, Arte Urbana e Dj’s.

O Compostela Skate pecharase cun concerto a modo de showcase para que Saibran, Sandra FG, Mahía, e André GS poidan mostrar a diversidade do seu talento. Sobre o cartel, o coordinador Rubén Varela, DJ Mil, explicou que se trata na súa maioría de “artistas novos pero moi prometedores, que están xerando un gran interese entre a comunidade”, matizando que non só chaman a atención da xente máis nova senón tamén dos maiores.