O novo presidente do Consello da Avogacía Galega reclama máis recursos para a xustiza gratuíta

O decano do Colexio de Avogados de Santiago, Francisco José Rabuñal Mosquera, tomou posesión este venres como novo presidente do Consello da Avogacía Galega (CAG), cargo no que sucede a Augusto Pérez-Cepeda. No acto, que se desenvolveu no Museo do Pobo Galego, estivo arroupado por representantes institucionais e compañeiros de profesión e reclamou á Xunta de Galicia que incremente o orzamento para a xustiza gratuíta.

No seu discurso, Francisco Rabuñal sinalou que, “un dos fins do Consello da Avogacía Galega é o de manter a unidade de actuación na nosa profesión na defensa dos dereitos e liberdades da cidadanía, ao tempo que defendemos os das avogadas e avogados”. Ademais, suliñou que “non desistiremos no empeño de demandar todas as unidades xudiciais que sexan necesarias para unha tutela xudicial efectiva”.

Máis recursos para a xustiza gratuíta

Con respecto á petición de aumentar os recursos, Rabuñal sinalou que “o CAG mantén un diálogo permanente coa Xunta co fin de mellorar as condicións económicas e de servizo”.

Do mesmo xeito, Rabuñal tamén reivindicou melloras nas condicións laborais do sector. “A tutela xudicial efectiva ou a dignidade das persoas son dereitos recollidos na nosa constitución, como tamén o é o dereito a unha pensión digna. Nese sentido, o Consello da Avogacía Galega non desistirá no empeño de demandar que todos os colexiados poidan gozar dunha pensión suficiente”, agregou.

Consello da Avogacía Galega

Francisco Rabuñal foi reelixido en decembro do 2022 decano do Colexio da Avogacía de Santiago de Compostela e permanecerá no cargo ata o 2027. Tras as eleccións do 1 de agosto, compatibilizará esta responsabilidade coa presidencia do CAG. Este órgano é unha corporación de dereito público integrada polos colexios da avogacía de Galicia (A Coruña, Lugo, Ourense, Pontevedra, Ferrol, Vigo e Santiago) cuxa finalidade é agrupar, coordinar e asumir a súa representación en asuntos de interese común ante a Xunta de Galicia e, en xeral, ante calquera organismo, institución ou persoa, física ou xurídica, en todo o que sexa necesario para o cumprimento dos seus obxectivos.

As súas competencias inclúen actividades formativas e divulgativas, colaborar cos poderes públicos ou defender os dereitos dos colexios de avogados de Galicia e dos seus colexiados, entre outras.