“Utilízannos como chivos expiatorios”: aprobación definitiva da ordenanza dos pisos turísticos entre o enfado dalgúns propietarios

O Pleno municipal deste luns (adiado o pasado xoves por mor do loito oficial polas vítimas da DANA en Valencia) comezou, como é habitual, cunha intervención cidadá. En representación dos propietarios de VUT (vivendas de uso turístico) falou, visiblemente cabreada, Estrella Ferreiro para denunciar que Goberno local e oposición socialista están a utilizar os titulares de pisos turísticos como “chivos expiatorios das súas eivas na xestión da cousa pública”.

Ferreiro quixo deixar claro na súa intervención que aos propietarios lles chama á atención que habendo “6.198 vivendas baleiras” en Santiago “o problema son as 681” VUT inscritas no REAT (Rexistro de Empresas e Actividades Turísticas) da Xunta.

Un rexistro este último ao que tamén se referiu o concelleiro de Urbanismo, Iago Lestegás, denunciando unha vez máis que a Administración autonómica non retire do mesmo aqueles pisos turísticos “que carecen de título habilitante municipal”. Neste sentido pronunciouse tamén a concelleira María Rozas, voceira de Compostela Aberta (CA), para defender que dende o Goberno local «non imos legalizar VUT sen licenza aínda que teña a complicidade da Xunta» e afeoulle a esta última que «as administracións debéramos traballar da man» neste asunto, «sen cálculos electoralistas». María Rozas asegurou que a medida permitirá «en poucos meses» que haxa máis oferta de vivenda.

Interrupcións dende o público

A ordenanza aprobouse, como estaba previsto, cos votos a favor de PSOE, BNG e Compostela Aberta, logo dun debate onde a tensión dos propietarios de VUT presentes no Salón de Plenos de Raxoi se fixo evidente con varias interrupcións ao edil Lestegás e á alcaldesa Goretti Sanmartín. 

El Supremo establece que las comunidades de propietarios puedan ‘vetar’ los pisos turísticos

Unha destas interrupcións tivo lugar logo da intervención do líder do PP, Borja Verea, que definiu a ordenanza como “unha grande mentira” da que responsabilizou a Goretti Sanmartín. “Os poucos votos que lle gañou ao PSOE” nas pasadas eleccións “seguramente se deberon á promesa de legalizar 800 VUT”, achacoulle Verea a Sanmartín defendendo a constancia desta promesa en documentos municipais e “no Parlamento” e asegurando que sobre esta acción da alcaldesa “se fará xustiza política”.

Goretti Sanmartín interveu para incidir en que os datos que manexa o Goberno local indican que a repercusión da aprobación da ordenanza sobre o parque residencial da cidade “será positiva” e explicou que as avaliacións deberán facerse co paso do tempo. Sobre as acusación de Verea, Sanmartín unicamente apuntou que “non vou entrar nas mentiras e difamacións do Partido Popular”.

Mentres tanto o concelleiro de Urbanismo coma as edís María Rozas (CA) e Mercedes Rosón (PSOE) defenderon a oportunidade da aprobación desta ordenanza no camiño de lograr destensionar o mercado do alugueiro na cidade e a revitalización da cidade histórica, o Partido Popular tachaba a medida de “erro” e “grande mentira”. 

El alquiler sube menos en Santiago que en otras ciudades con menos vivienda turística

Con esta ordenanza “case todas as vivendas de Santiago poderán ser VUT durante dous meses”, denunciou o voceiro do PP, Borja Verea, que manifestou o seu amor pola cidade histórica e afeou o “fracaso histórico das políticas de vivenda” nesta área por parte de PSOE, BNG e CA.

Ás palabras de Borja Verea respondía Lestegás defendendo que “os usos de hospedaxe asimilados á vivenda” non suporná que por dous meses calquera residencia poida ser VUT senón que “só se poderá levar a cabo en inmobles que sexan residencia habitual”, deberá cumprir unhas mínimas condicións técnicas (sistemas de emerxencia e accesibilidade, entre outros) e deberá aprobalo a comunidade de veciños.