Obxectivo 25-N: non mirar a outro lado ante a violencia machista

Baixo o lema «Se non queres ser cómplice, mellor implícate» desenvólvese dende este venres a campaña municipal do 25-N, Día internacional pola eliminación da violencia contra as mulleres, que presentou en Raxoi a alcaldesa Goretti Sanmartín, e titular da área de Igualdade do Concello de Santiago. «Realmente estamos nun momento crítico, difícil, nesta efeméride que sempre ten que ser reivindicativa, de denuncia, temos un forte impacto de cifras de violencia machista, de agresións, pero, sobre todo, eu quixera lembrar eses catro feminicidios en Galicia este ano: Andrea Yturry, Mercedes Ríos, Fadoua Akkar e, esta pasada fin de semana en Baiona, Estela Blach».

Santiago súmase ás reivindicacións do 25N: "O teu machismo dá noxo"

Así comezaba a súa intervención a rexedora, para presentar esta campaña «liderada por un equipo de mulleres do ámbito creativo, especialistas en temas de igualdade, e deseñada para interpelar a cidadanía» contra a violencia de xénero e «de maneira moi particular» contra os feminicidos. Sanmartín defendeu a necesidade deste tipo de campañas, «saír á rúa para chamar á atención de toda a sociedade».

E con este obxectivo a campaña deste ano do 25-N interpela directamente ao 23,1% de persoas que negan a violencia machista. «Queremos falar a todas as persoas para que pensen que teñen na súa man un poder moi grande, que é o de actuar», afirmou rotunda a alcaldesa, para reivindicar que a loita contra a violencia de xénero é «unha responsabilidade partillada». 

A campaña, que vai contar con cartelaría, camisolas, mupis e publicidade na traseira de dous buses urbanos difunde frases como: «Isto non vai contigo», «Dubido moito que poidas facer algo» e «Seguro que non podes facer nada». Porque, segundo explicou Sanmartín, «se miramos para outro lado cando sabemos de casos de violencia, se non intentamos facer algo, ao final recorremos a outra forma de violencia».

A alcaldesa non deixou pasar a ocasión de referirse a Gisèle Pelicot, «este é un ano especial para o movemento feminista, de certo empoderamento e reivindicación, a vergoña ten que cambiar de lado, inspíranos o paso valente de Gisèle Pelicot».

A Casa Xohana Torres

Ademais do material que o Concello de Santiago vai repartir polas bibliotecas públicas, centros de ensino e socioculturais, universidade e locais de comercio e hostalaría, coma cada ano, tamén estará dispoñible para negocios e cidadanía máis material promocional na Casa Xohana Torres –rúa Bernardo Barreiro–. «Toda a cidadanía pode recoller material na Casa Xohana Torres, entre o próximo luns e o 23 de novembro, en horario de mañá e de tarde».

A alcaldesa Sanmartín fixo referencia tamén, durante a súa intervención no Pazo de Raxoi, a outros actos enmarcados na conmemoración do 25-N que se van levar a cabo dende o Concello. Un deles será a presentación o vindeiro día 22 do libro Caídas, de Montse Fajardo, gañadora do Premio Xohana Torres 2023 con este traballo.

A Corporación municipal repetirá tamén o propio 25 de novembro a xa tradicional declaración institucional, ás 12 horas nos salóns do Pazo de Raxoi, para mostrar o seu rexeitamento á violencia machista.