Melloras no rural: afianzar a seguridade vial en Marrozos

A concelleira de Rural, Pilar Lueiro, supervisou este martes a reforma do vial Pajuela-Campo da Festa de Marrozos. Unhas obras ao abeiro do POS+ da Deputación da Coruña que contan cun orzamento de 448.450 euros, e que segundo o Goberno local, «ratifican o firme compromiso deste goberno con todo o territorio compostelán». 

Investimento de 800.000 euros para dous proxectos na parroquia de Marrozos

Lueiro, que estivo acompañada de representantes veciñais, destacou que esta intervención permitirá a ampliación dun viario municipal para mellorar a circulación de vehículos e persoas nun tramo da traza da Ruta da Prata (Camiño de Santiago). Os representantes veciñais trasladaron un retorno positivo da evolución das obras.

Trátase dunhas obras de mellora da seguridade viaria para a que, entre outras, actuacións se instalou unha malla na ponte que cruza estrada nacional. Unhas obras «necesarias», en palabras da concelleira Pilar Lueiro, «e das que vimos de recibir un feedback moi positivo dos veciños e veciñas». As actuacións deste proxecto incluíron a canalización de 1.390 metros de tubo plástico, cos seus respectivos sumidoiros e arquetas para a recollida de pluviais e a canalización de 1.885 metros para alumeado público. 

A edil aproveitou para anunciar a segunda fase destas actuacións, «a xunta de goberno do pasado luns axudicou o contrato para as obras que van da Cañoteira ao Outeiro de Marrozos», que contan cun importe de 351.420 euros.

A concelleira de Rural lembrou os 3,5 millóns «que conseguimos polo aparcadoiro que se vai facer no Clínico e que vai ir todo destinado ao saneamento e abastecemento das parroquias do rural». Lueiro reafirmouse en que o Goberno local seguirá a traballar para satisfacer os «dereitos desta veciñanza, porque queremos un concello do que esteamos todos orgullosos, e para que o rural teña os servizos que tamén hai no urbano".