O actor que puxo Santiago no mapa da comedia coa primeira sitcom galega 'Composteláns' entra no Álbum de Galicia

Coñecido pola súa inesgotable creatividade e humor irreverente, Antonio “Toñito” Blanco, foi un dos principais artífices da comedia galega dos anos oitenta e noventa. O Consello da Cultura Galega acaba de incluilo no seu Álbum de Galicia, a colección de biografías dixitais da institución. Intérprete, creador cultural, director e produtor, Antonio, “Toñito”, Blanco (A Coruña, 1964 - A Coruña, 22/11/1994), é “un dos artistas máis breves e influentes da Galicia dos oitenta e noventa”, segundo o describe o guionista Nico Campos. Coñecido polo seu único filme A matanza caníbal dos garrulos lisérxicos, Blanco traballou tamén no eido televisivo na Televisión de Galicia (TVG) e na Televisión Española (TVE) en Galicia, cun “estilo recoñecible” ata hoxe, malia a súa prematura morte hai xa 30 anos.

'Composteláns', a primeira sitcom galega

Entre os proxectos máis destacados de Toñito Blanco figura Composteláns, a icónica serie de TVE considerada a primeira sitcom galega que marcou unha xeración e estableceu unha nova maneira de facer ficción na televisión en galego.

Dirixida por Josito Pereiro e emitida a finais dos anos 80, a serie xurdiu como unha evolución natural do traballo de Toñito no programa Canal 13, o que vostede se merece, onde presentaba a sección humorística de Serafín Cordeiro, un reporteiro de estilo desenfadado. En "Composteláns", Toñito asumiu o papel principal, interpretando a un estudante bohemio que compartía piso con Antón (o "eterno estudante" interpretado por Antón Losada) e Serafín, agora convertido en asesor na Xunta.

Gravada nun piso real da rúa República Arxentina de Santiago, Composteláns foi unha das primeiras series en captar con autenticidade o espírito universitario e cultural de Compostela, con diálogos frescos e situacións cotiás cheas de humor galego. A mestura de sarcasmo, crítica social e retratos entrañables dos personaxes fixo que a serie se convertese nun referente da ficción televisiva en Galicia.

Un proxecto feito "na casa"

A produción de Composteláns foi un auténtico reto técnico e creativo. Toñito, xunto a outros colaboradores como Suso Iglesias, trasladaron todo o equipo de gravación a un piso alugado, que servía de plató, oficina e ata dormitorio para o equipo. Durante dous meses, traballaron contrarreloxo para gravar os 39 episodios da serie, moitos dos cales se poden ver hoxe en YouTube.

A serie non só destacou pola súa narrativa, senón tamén polo seu impacto na evolución do audiovisual galego. Grazas a Composteláns, Toñito consolidouse como un dos creadores máis innovadores do seu tempo, demostrando que as limitacións orzamentarias podían superarse cunha boa dose de imaxinación e paixón.

O legado de Toñito Blanco

Antes de Composteláns, Toñito xa deixara pegada na TVG con A Tumba Aberta, onde falaba do mundo do cómic dun xeito único, e no departamento de promocións, onde creou anuncios que marcaron estilo. Posteriormente, implicouse en proxectos como o Xabarín Club, unha das iniciativas televisivas máis queridas en Galicia, onde se lle reservou unha sección especial que, por desgraza, non chegou a realizar debido á súa prematura morte en 1994.

Malia a súa curta traxectoria, Toñito Blanco deixou pegada no audiovisual galego. Con obras como a película de serie b La matanza caníbal de los garrulos lisérgicos, levou o nome de Galicia a festivais internacionais, pero foi en proxectos como "Composteláns" onde mostrou o seu amor pola súa terra e a súa capacidade para conectar co público