O Pleno local aproba o "rexeitamento frontal" ao cambio da senda da Xunta polo bosque do Banquete

A concelleira socialista Mercedes Rosón foi a encargada de mover o Pleno municipal ao "rexeitamento frontal" da Corporación local ás mudas anunciadas pola Xunta de Galicia sobre a senda ciclista entre O Milladoiro e Santiago ao seu paso polo bosque do Banquete de Conxo. Unhas modificacións adoptadas logo da apertura de dilixencias xudiciais en Compostela e dende a Unión Europea en resposta ás denuncias de Ecoloxistas en Acción.

Abren investigación penal contra la Xunta por las obras del Bosque del Banquete de Conxo: estos son los motivos

"Cando as cousas se fan ben non hai porqué cambialas", afirmou Rosón para denunciar que nesta cuestión "a Xunta errou asfaltando as beiras do Sar e cortando árbores históricas". Erro que se demostra coa decisión de mudar o trazado da senda polo bosque de Conxo. "Celebramos que se abran a mudar o trazado pero segue a haber eivas importantes".

Sobre estes defectos Mercedes Rosón fixo referencia a petición do PSOE en febreiro de 2023 de realizar prospeccións arqueolóxicas ou protexer o túnel de Renfe como patrimonio cultural da cidade. "Isto segue sen facerse, séguese a empregar formigón poroso" e segundo a edil "non hai cambio ningún" en relación ao dictame de Patrimonio da Xunta.

A concelleira socialista, máis alá de reclamar o "rexeitamento frontal da Corporación", indicou que ademais a senda entra en contradicción co proxecto Eco-bosque río Sar, posto en marcha no mandato socialista e que tamén conta con fondos europeos para a reforestación da ribeira do río.

Pola súa parte o concelleiro de Urbanismo, Iago Lestegás, recordou que dende o Goberno local se defendeu que a conexión O Milladoiro-Santiago "se tiña que facer doutro xeito" e que se ofreceron alternativas para non atravesar o bosque que a Xunta rexeitou.

Lestegás non deixou escapar na súa quenda de palabra unha crítica velada ao contido da Lei de acompañamento aos orzamentos da Xunta en materia de vivenda -o concelleiro asegura que se pasa por riba dos planeamentos urbanísticos dos concellos-. "Fanse as cousas sen coñecemento do territorio e pasando por riba das administracións locais", afirmou respecto ao trazado da senda ciclista.

O líder do PP defende o "proxecto transformador"

Para o voceiro do PP en Raxoi, e deputado no Parlamento galego, Borja Verea, prima o "carácter transformador na mobilidade" do proxecto que leva a cabo a Xunta de Galicia. "Dicían que isto era unha ocorrencia miña, como tamén o parking do Hospital Clínico que logo asinaron".

Verea carga contra BNG, PSOE y CA por su oposición a la senda entre Milladoiro y Santiago

Para Verea, coa senda O Milladoiro-Santiago confirmarase "o modus operandi" do Goberno local: "primeiro din que minto, logo poñen obstáculos ao proxecto e, finalmente, mudan o seu relato para sumarse ao proxecto". Segundo o concelleiro do PP, se finalmente o proxecto é un éxito defenderao o Executivo de Sanmartín e "se por calquera cousa fracasa" a responsabilidade depositarana na súa figura.

O líder do PP local non só defende a senda ciclista senón tamén a fe do seu grupo neste proxecto que contou dende o inicio coa oposición veciñal. "Reunímonos cos veciños, que estaban en contra da senda, e defendemos o proxecto porque cremos nel, aínda sabendo que non íamos sacar un voto".