O mural do Xelmírez I «elévase» cara ao coñecemento

O IES Xelmírez I loce un novo aspecto na súa fachada que dá á rúa Poza de Bar. Trátase dun mural que evoca «a elevación á que leva o coñecemento», segundo explica un dos autores, Møu, de Mutante Creativo, que xunto a Sokram (do mesmo colectivo) é coautor da nova imaxe do instituto. Unha intervención que se encadra dentro do programa de muralismo que leva a cabo o departamento de Xuventude do Concello de Santiago e que se suma a outras dúas actuacións en fachadas de candansúa vivenda na Choupana e Vista Alegre.

‘O Parlamento’, a vida en común no rueiro no barrio de Conxo

A concelleira de Xuventude, María Rozas, visitou este xoves o Xelmírez I para ver xunto a Møu o resultado final do mural e felicitouse porque «este ano incrementamos o programa de muralismo e fixemos máis actuacións das que eran habituais, esta aquí no instituto, outra na Choupana e outra en Vista Alegre». A intervención de Møu e Sokram no Xelmírez I é a obra de maior tamaño das tres, todas elas polo colectivo Mutante Creativo, «o mural de Vista Alegre está feito por Noe Nobel e o de Choupana por Doa», apuntou Rozas. 

A edil reivindicou que o programa de muralismo do Concello «é un proxecto que dentro do departamento de Xuventude tiñamos interese de apostar e de reforzar porque entendemos que é moi interesante actuar en espazos urbanos que están deteriorados e facelo, ademais, cunha expresión artística que conecta moi ben cos mozos e mozas». Rozas non agochou a satisfacción do departamento que dirixe co resultado final do proxecto e «tamén estamos moi contentas de facer colaboración co Instituto Xelmírez I, un instituto que sempre demostrou ter esa sensibilidade artística e esa aposta pola mocidade».

O significado da pintura

«Quixemos plasmar no deseño esa actitude na vida de sempre intentar conseguir ascender no coñecemento», conta Møu sobre o mural creado xunto a Sokram e que consiste en «dúas figuras que están coma flotando, para representar esa elevación a través do coñecemento».

Sobre a realización do traballo na fachada do instituto, bastante deteriorada, o artista explica que foi un reto, «principalmente porque son dúas paredes que teñen profundidade: interior e exterior e quixemos xogar con eses dous planos, facendo coma unha repetición de figuras».