O PSOE de Santiago reclama un bus que pase pola zona alta da Almáciga

O portavoz do grupo municipal socialista, Gonzalo Muíños, vén de reunirse cunha representación veciñal do barrio da Almáciga. Unha xuntanza que serviu para testear o grado de cumprimento do goberno bipartito coas demandas deste barrio, atopando unha grande «preocupación» pola falta de avances nas solicitudes que lle foron manifestadas ao executivo de Sanmartín en setembro de 2023.

O PSOE de Santiago aposta por ampliar o programa dos Bonos Corazón con dúas convocatorias

O edil socialista pon o foco na mobilidade no barrio e insta ao goberno local a implantar unha liña que de servizo ao barrio ata a zona máis elevada, toda vez que o importante desnivel da zona xera dificultades nos desprazamentos peonís das persoas con diversidade funcional. Muíños lembra que esta era unha cuestión prevista xa nos novos pregos do servizo de autobuses. Porén, ante o precedente da creación da liña ao aeroporto, entende que agora si se podería modificar algunha das liñas .

Aparcamento

Muíños propón tamén que se estude a posibilidade de empregar como aparcamento de residentes as plataformas situadas detrás dos edificios da rúa de Touro para eliminarse unha das bandas de aparcamento desta rúa «xa que, a día de hoxe, o acceso dun camión de bombeiros ante unha urxencia sería moi dificultosa». Así mesmo, a veciñanza da zona reclama un maior control daqueles vehículos que cada día estacionan en zonas prohibidas.

O protavoz socialista levará ao Pleno do vindeiro xoves unha moción coa que instará ao goberno local a atender as solicitudes das veciñas e veciños da Almáciga. Nesa lista de tarefas pendentes, está tamén a reparación do pavimento da rúa de Santa Clara e outras cuestións que requiren dun menor esforzo orzamentario, como a instalación dunha «visera» ou un pequeno voladizo na porta do centro sociocultural do barrio.