A Estación Intermodal de Santiago porá en valor a figura de Castelao

O Concello de Santiago presentou este martes a proposta gráfica e de intervención no espazo da Estación Intermodal, que será denominada Estación Daniel Castelao. A figura do polifacético intelectual galego porase en valor na terminal compostelá e, con Rosalía de Castro dando nome ao aeroporto, "a xente que viaxe e que nos visite, terá en fronte dela dous referentes dentro da nosa conformación, da defensa da nosa lingua, da nosa identidade e da nosa cultura", sinalou a alcaldesa Goretti Sanmartín.

Intervención en tres niveis

A rexedora presentou a proposta gráfica para a estación acompañada polo deseñador Pepe Barro, Premio da Cultura Galega 2024. Barro explicou que se contemplan tres niveis de intervención. O primeiro deles sería a colocación da palabra "Castelao" en letras grandes nos dous accesos á estación, en Clara Campoamor en sentido horizontal e no Hórreo en vertical con forma de tótem.

Santiago acolle parte da rodaxe da primeira película sobre a vida de Castelao

Ademais, en diferentes espazos da terminal aparecerían estatuas coa silueta de Castelao e dalgúns dos seus debuxos. Por último, inclúese unha especie de centro de interpretación duns 180 metros cadrados, que estaría dividido en catro partes para expoñer en cada unha delas elementos relativos ás catro facetas principais de Castelao: humorista, escritor, político e artista.

Orzamento de 150.000 euros

A denominación de Estación Daniel Castelao e a intervención museística dentro da terminal foi aprobada polo pleno municipal en 2019. Ademais, Sanmartín sinalou que o acordo do BNG co PSOE para investir a Pedro Sánchez como presidente do Goberno inclúe que se execute ese acordo. A alcaldesa indicou que a proposta elaborada por Pepe Barro, cuxo desenvolvemento cifrou en 150.000 euros, xa foi trasladada ao administrador ferroviario ADIF e agarda que "sexa unha realidade".

Adif achaca al mal tiempo el retraso que acumula la nueva estación de tren de Santiago

A rexedora incidiu ademais en que o 2025 foi declarado Ano Castelao, coincidindo co 75 aniversario do seu falecemento. Desta maneira, considerou que é "o momento idóneo" para desenvolver esta intervención, "acompasándose" tamén coa finalización das obras na estación, prevista para o primeiro semestre do ano.

Pendentes do aparcamento

A alcaldesa precisou que, aínda que os traballos da nova terminal ferroviaria finalicen neste tempo, quedará pendente o proxecto do aparcamento. En calquera caso, Sanmartín aclarou que terá que ser o propio ADIF, como responsable das obras quen ofreza os prazos concretos.

Sanmartín pacta con el presidente de Adif el inicio de las obras del parquin de la Intermodal en 2025: tendrá 900 plazas para diversos usos

"Eles din que as obras van ben, van en tempo", explicou. Ao mesmo tempo sinalou que "queren acompasar iso agora coa licitación do que sería o aparcadoiro en altura, polo tanto, as obras van seguir ao longo de 2025", co que a certificación final "aínda vai levar un tempo".