Borja Verea esixe o "desmantelamento inmediato do principal supermercado da droga de Santiago"

O líder do PP de Santiago compareceu este luns en rolda de prensa para denunciar o incremento da criminalidade en Compostela en 2024, cunha cifra que supera os 5.000 delitos (pasando o total de infraccións de 4.769 en 2023 a 5.056 en 2024). "Santiago é a cidade con maior ratio de delitos por cada mil habitantes", denunciou para tamén poñer o foco no problema actual en Santa Marta e preguntar a BNG, Compostela Aberta e PSOE se "queren o desmantelamento total do principal supermercado da droga de Santiago? Cales son as medidas concretas? Non son críticas, son preguntas", asegurou Verea.

O voceiro do Partido Popular en Raxoi, que na súa comparecencia estivo acompañado polo eurodeputado popular Adrián Vázquez, afirmou que dende a súa formación non se queren buscar culpables "pero si unha reacción política", non só á problemática de Santa Marta, senón ao incremento xeral da criminalidade.

Nesta liña, Borja Verea asegurou que "é un clamor nas rúas e nos barrios que a veciñanza sente inseguridade" e en aras dunha Compostela máis segura indicou cinco actuacións que levaría a cabo se fose alcalde.

Santiago se consolida como la tercera ciudad gallega con más delitos

Os datos do Ministerio do Interior

O voceiro do PP indicou na rolda de prensa que o total de infraccións se situaba nas 5.056 en 2024 e, en 2023, a cifra achegada polo Ministerio de Interior foi de 4.769. En canto á criminalidade convencional (homicidios, pelexas, subtraccións de vehículos, roubos e agresións sexuais) os datos de 2024 elévanse dos 3.981 do ano anterior a 4.205 en 2024, un 5,6% máis. Pero o curioso é que, pese a este incremento, só os furtos, as pelexas e os roubos de coches aumentan, o resto da criminalidade convencional decae.

No caso das subtraccións de vehículos a cifra elévase un 123,5%, pasando de 17 roubos de coches en 2023 a 28 en 2024; os furtos increméntanse un 9,1% e pasan de 1.379 a 1.505. Os delitos por pelexas incrementáronse de 47 a 58.

Sobre tráfico de drogas, de actualidade na cidade pola inseguridade causada polos "trapicheos" no Banco do Pobre, segundo os datos feitos públicos polo Ministerio do Interior hai unha diminución a case a metade de delitos, pasando de 30 en 2023 a 16 en 2024. Tamén se reduciron os delitos contra a liberdade sexual, que pasaron de 61 a 35 e as agresións que implicaron penetración, 13 en 2023 e 10 en 2024.

A mesma redución aprézase nos roubos con violencia, que pasan de 263 a 210 e, no caso dos domicilios, pasan de 110 a 95. Uns datos que dalgún modo si avalan a afirmación do Executivo de Goretti Sanmartín, que unha e outra vez defenden que "Santiago é unha cidade segura".

As liñas de acción de Verea a prol da seguridade

"En 2004 había 175 policías locais en Santiago, en 2025 hai 121, así non se poden facer as rondas necesarias". É por isto que Borja Verea reflexiona á vista da poboación censada e da flotante da capital galega que serían necesarios uns 220 efectivos da Policía Local. Unha cifra para a que o PP, se estivese no poder, crearía "un plan plurianual de contratación", para ese incremento nun cento de efectivos.

A segunda medida é unha reivindicación xa clásica do PP, "activar a gravación das cámaras de videovixiancia e colocar máis, porque asustan ao delincuente e achegan sensación de seguridade á cidadanía".

O PP no poder tamén "elevaría o rango da comisaría de Policía Nacional en Santiago". Cuestión que anunciou estes días o ministro Fernando Grande-Marlaska de cara a 2026. O anuncio foi ben recibido polo Goberno local e que o eurodeputado Andrián Vázquez apuntou como mérito do PP. "Estiveron arrastrando os pés ata que menos mal que denunciamos a situación nós en Santiago", afirmou ao tempo que lle suxeriu á alcaldesa Goretti Sanmartín, "que se debe levar ben co ministro", que lle pida ao Goberno central que axude directamente neste asunto.

Asociaciones de vecinos achacan "al trabajo policial poco efectivo" el aumento de venta de drogas en Santiago

A cuarta medida que propuxo Borja Verea para incrementar a seguridade na cidade é o redeseño da iluminación pública, mellora que levou ao pasado Pleno municipal. O PP denunciou unha vez máis que "os 40 millóns contrato de iluminación en 2024 deron lugar a un proxecto que non funcionou", e a mala iluminación contribúe á sensación de inseguridade, sobre todo nas mulleres.

A quinta e última medida é a referida ao tráfico e consumo de drogas no barrio de Santa Marta e a conseguinte inseguridade e insalubridade na zona.

A resposta de BNG, CA e PSOE

Sobre Santa Marta pronunciábase minutos antes a voceira do BNG, Míriam Louzao, para asegurar que o Goberno local "non nega ningunha circunstancia" e explicar que durante a fin de semana se tomou a decisión de "mellorar e aumentar a limpeza da zona para eliminar situacións de inseguridade".

As medidas do Concello consisten tamén incrementar a colaboración entre as policías nacional e local e traballar "para paliar esta cuestión" tamén dende a UMAD (Unidade Municipal de Atención a Drogodependencias) e Servizos sociais.

Compostela Aberta, cuxos edís son responsables de Policía Local e Servizos sociais, recoñece que se ben "é certo que hai un déficit de persoal tanto na Policía Local como na Policía Nacional" tamén aclaran que esta situación "ten a súa orixe fundamentalmente na taxa de reposición que lle debemos a un goberno do PP". Dende CA afirman que se están a cubrir as prazas na Policía local na medida en que o permite a legalidade e lémbranlle aos populares que "a competencia en relación ás operacións antidroga é da Policía Nacional", dando por feito que o PP "non pón en dúbida a actuación dos Corpos e Forzas de Seguridade do Estado".

Dende a bancada socialista en Raxoi non tardaron en dar resposta á pregunta de Borja Verea sobre se "queren o desmantelamento inmediato do principal supermercado da droga de Santiago". O aínda voceiro do grupo municipal en Raxoi, Gonzalo Muíños, asegurou que "aínda que Santiago é unha cidade segura, temos que coidar que así siga sendo, antes de que a inseguridade sexa un problema real. E, o que todos queremos, evidentemente, é o desmantelemento total dese centro de tráfico de drogas".

Muíños tamén fixo referencia a que elevar o nivel da comisaría a tipo A, "cun incremento de efectivos en torno a 70 ou 80" profesionais máis "e dispoñendo de servizos especiais dos que agora carecemos" se poderá "coordinar unha resposta conxunta ao problema específico de Santa Marta e tamén traballar no reforzo policial para toda a cidade".