O PP demanda liberar tamén as tardes na ORA de Santa Marta

«Hai un ano, logo de manter reunións coa veciñanza e co tecido comercial, levamos ao Pleno a supresión desta ‘zona de recadación’», lembraba onte o edil do PP Adrián Villa en relación co anuncio do Goberno local de suprimir a zona ORA en Santa Marta os sábados pola mañá. Villa puntualizou tamén que a iniciativa levada ao Pleno «foi aprobada e na súa liña habitual os nacionalistas están a facer caso omiso á maioría da corporación municipal».

Villa remarcou que «o BNG tardou un ano en darse conta do erro cometido e, o que é máis grave, unha vez localizado o fallo, non corrixen todas as deficiencias por non querer asumir a súa incompetencia». O PP denuncia que a zona ORA nesa contorna «está baleira» e que «nas tardes de luns a venres, hai centos de prazas sen ocupar». Polas mañás, os populares afirman, logo de falaren coa veciñanza, que «se fai necesaria a rotación» mentres non estea rematado o parking do CHUS.

A zona ORA deixará de estar operativa os sábados na contorna do CHUS

Por esta razón o PP demanda que o BNG «amplíe esa liberación anunciada para a mañá dos sábados, ás tardes do resto da semana e que deixen de perder o tempo con improvisacións e estudos absurdos, xa que, os que mellor teñen estudado o asunto son as persoas que viven e traballan no barrio de Santa Marta».

Villa aproveitou tamén para denunciar a falta de puntos de luz no aparcamento do CIMUS e reclamar a mellora do seu firme.