Compostela entrégase ao Entroido: dez carrozas e vintedúas comparsas enchen de festa e cor as rúas da cidade

Dende a sobremesa deste Martes de Carnaval as rúas da cidade eran un ir e vir de xente disfrazada. Compostela entregouse por completo ao Entroido e a primeira parada do roteiro entroideiro foi a avenida de Ferrol. Alí congregáronse carrozas –10– e comparsas –22– e dende ese punto comezaron a percorrer as rúas da capital. Desfilaron por Frei Rosendo Salvado, pola praza Roxa, pola rúa da República do Salvador, polo Hórreo, pola rúa da Senra e pola avenida de Xoán Carlos I.

Vintedúas comparsas e dez carrozas: Santiago celebra o día grande do seu Entroido

Ver galería

Pero mentres acababan de compoñer carrozas e disfraces na avenida de Ferrol as rúas do percorrido do desfile xa estaban ateigadas de xente á espera. Agardando o pase de comparsas tan coñecidas coma Los Infieles ou A Ruliña de Laraño, tan sonoras coma os Solfamidas ou tan singulares coma os Paparrulos ou a Asociación Cultural Mar de Fondo.

Frei Rosendo Salvado, Hórreo, Senra ou República do Salvador eran rúas coas beirarrúas repletas de spidermans e batmans, dragóns e dinousaurios, fadas e sereas, piratas e monxas desexosos de que comezasen a desfilar polo lugar no que estaban apostados os coches de choque, o Sar Prix, os exipcios, os asiáticos, o Galeón Mili, a astronave ‘Galaico’, as xirafas ou os vehículos atrezzados como motos de Correos.

Ambiente de festa e ambiente familiar, de feito ata The Simpsons se pasearon este Entroido por Santiago. E tamén ambiente de tráfico, pois nas horas do desfile os desvíos da circulación fixeron do centro da cidade un rebulir de vehículos, sen incidencias, e non só un rebulir de ‘choqueiros’ de todas as idades.

O desfile partiu ás 17.30 horas da avenida de Ferrol até a Xoán Carlos I e dende aí encamiñouse cara á rúa Concepción Arenal, á Sala Capitol, onde ás 20 horas se gozou da actuación da Charanga Ardores. Espectáculo previo á entrega de premios para os mellores disfraces de 2025, as mellores carrozas e as mellores comparsas.

Obxectivo: participación

A concelleira de Festas, Pilar Lueiro, e o edil de Centros socioculturais, Xan Duro, foron parte do equipo de goberno que explicitou a intencionalidade do programa desta celebración: a participación e a socialización. Sen dúbida Compostela, un ano máis, respondeu ao chamado, pero tamén os concelleiros predicaron co exemplo e, particularmente, a alcaldesa Goretti Sanmartín.

'O Gorettariado': o equipo de goberno vólveo facer e este ano disfrázase de Goretti Sanmartín

Pouca dúbida hai do gusto da alcaldesa polo disfraz e polo Entroido, pero tampouco está en cuestión esa paixón dentro do equipo de goberno do BNG. Se o ano pasado chanceaban coa crítica de Borja Verea e do PP local en relación ao «sultanato» de Sanmartín polo número de asesores e altos cargos do Executivo local, este ano tocou seren todos Goretti, e así caracterizados, rexedora incluída, pousaban nos salóns do Pazo de Raxoi.

Pero non foi ese o único evento de disfraces no que tomou parte a alcaldesa. Acudiu tamén disfrazada o domingo ao desfile dos máis cativos na Sala Capitol, repetiu ao día seguinte no evento dedicado ás Marías e, o propio martes de Entroido, ademais de satirizar sobre ela mesma na foto de familia cos concelleiros do BNG, tamén se disfrazou de astronauta, disfrace que compartiu nas súas redes.

A despedida do Meco

A festa aínda non remata, este mércores hai un evento fundamental en todo Entroido, a queima do Meco. A cita comeza ás 20 horas na praza do Toural, onde dende o sábado 1 de marzo reside o Meco, no Pazo de Bendaña. Dende alí sairá en peregrinación até a praza Roxa. Os fieis chorarano polas rúas Nova, do Vilar, da Senra, de Doutor Teixeiro e República do Salvador. Pero non chorarán sós, o percorrido farase acompañado polas comparsas Conformistas de Conxo, A Ruliña de Laraño, Os Armatroulas de Laraño e mais a Charanga BB+.

A queima do Meco, este ano ‘Enredando’ de rede social en rede social, con especial énfase en X, fixo unha particular dedicatoria á actualidade internacional e non puido deixar de lado o presidente dos Estados Unidos, Donald Trump. Para a queima «prégase levar loito rigoroso».

Entroido de Conxo

O 15 de marzo o Carnaval remata e en Compostela e faino con especial intensidade en Conxo. Ás 12 chegan os Vivas dos Xenerais da Ulla e o desfile da comparsa Os Conformistas e O Carro de Conxo. Percorrerán dende a praza da Mercé ao Campo de Conxo pasando polas avenidas de Ferrol e Vilagarcía e as rúas de García Prieto e Sánchez Freire.

Á unha é a hora da sesión vermú coa Mekánika Rolling Band, no Campo de Conxo, e tamén do Atranque dos Xenerais da Ulla na praza do Cruceiro Vello. Ás 15 horas celébrase un xantar popular na praza. A organización convida a que cadaquén leve o seu xantar e reserve previamente mesa no CSC de Conxo. Haberá polbeira, filloeira, posto de caldo, doces de Entroido e cantina da Comisión das Festas de San Serapio de Conxo.

Pola tarde volven os atranques coas Xeneraliñas da Semente, ás 17 horas concurso de orellas e filloas, xogo da piñata, foliada de entroido e ás 18.30 horas desfile de sombreiros e entrega de premios. O Meco quéimase ás 20, e logo, karaoke!