O desfile do Entroido e outros plans para este martes, 4 de marzo, en Santiago

Chega o día grande do Entroido con desfile e entrega de premios

FESTA. Santiago vivirá hoxe o día grande do Entroido. As carrozas, comparsas e charangas concentraranse desde as 16.30 horas na Avenida de Ferrol.

O desfile comezará unha hora despois e percorrerá a rúa de Frei Rosendo Salvado, praza Roxa, rúa da República do Salvador, rúa do Hórreo, rúa da Senra e avenida de Xoán Carlos I.

Nestas rúas non se poderá aparcar desde as 14.00 horas ata que remate o desfile. A actividade trasládase ás 20.00 horas á Sala Capitol, onde actúa a Charanga Ardores para dar paso ás 21.00 horas á entrega de premios en cinco categorías.

Para as carrozas haberá tres premios de 2.500, 1.500 e 1.000 euros. No caso das comparsas, que estarán compostas por un mínimo de 15 persoas, entregaranse premios de 2.000, 1.500 e 1.000 euros.

Na categoría de grupos, formados por entre 3 e 14 persoas, hai tamén tres premios, de 700, 400 e 200 euros. Ademais, haberá un premio de parella de 300 euros e tres individuais de 300, 200 e 100 euros.

Os non premiados entrarán nun sorteo polo que percibirán unha gratificación simbólica. Tamén haberá premios especiais para comparsas de parroquias ou barrios de 1.200, 600 e 400 euros.

Continúa a mostra de cine checo dos anos sesenta en Numax

PROXECCIÓN. Numax ofrece unha nova sesión da mostra de cine checo dos anos sesenta ás 19.45 horas.

O filme elixido é O incinerador de cadáveres, que contará coa presentación de Ramón Rey, crítico de cine e membro da distribuidora Lost&Found.

A película conta a historia do director dun crematorio, claramente trastornado, que ten a crenza de que a incineración purifica e alivia o sufrimento terreal.

Cun pouco de axuda das autoridades, decide asasinar a aqueles individuos que merecen o descanso eterno.

A mostra de Isabel Muñoz, dispoñible ata o día 15

EXPOSICIÓN. A sala de ámbito cultural do centro comercial El Corte Inglés de Santiago mantén aberta ata o día 15 de marzo a exposición Antes do tempo, da fotógrafa Isabel Muñoz.

Isabel Muñoz, Premio Nacional de Fotografía, en Santiago: «Hay que crear una contra Inteligencia Artificial»

Na mostra, a Premio Nacional de Fotografía resume o seu traballo no xacemento arqueolóxico de Göbekli Tepe (Turquía). Está formada por grandes caixas de luz, fotografía de gran formato, impresións con metais preciosos ou terra procedente do propio xacemento.