A MICE cumpre 20 anos promovendo o cinema etnográfico e a creación feminina

A Mostra Internacional de Cinema Etnográfico (MICE) do Museo do Pobo Galego chega neste 2025 á súa vixésima edición, dúas décadas nas que se proxectou a obra duns 800 cineastas e pola que pasaron arredor de 20.000 persoas para descubrir vellas e novas miradas sobre a realidade social dende unha perspectiva etnográfica e antropolóxica.

Nesta mostra que deveu en certame con competición oficial a perspectiva de xénero estivo presente na orixe e o compromiso feminista mantese á alza nesta edición na que o humor tamén vai xogar un papel fundamental.

Mar Caldas: “A memoria democrática é moi intensa nos netos pero existe o risco de que se perda”

Do 12 ao 16 de marzo vaise desenvolver esta XX MICE, cun programa que conta con case medio cento de filmes, encontros con cineastas e programación para profesionais e escolares. Na sección oficial compiten 13 películas -sete delas creacións de mulleres- de cadansúa nacionalidade e outórganse catro premios: AGANTRO á excelencia antropolóxica, MICE, CREA e o Premio do Público, de especial relevancia para organización do evento.

A entrega de galardóns terá lugar o domingo 16 ás 12.30 horas no Museo do Pobo, nun acto presentado pola poeta María Lado. As proxeccións repártense entre o propio museo, o cine Numax e o Teatro Principal.

O humor vai ser parte fundamental nesta edición da MICE e, como explica a directora da mostra, Ana Estévez, será ben conxugar "unha actitude crítica co sentido do humor", pois a ollada colonial dalgún dos filmes máis antigos pode ser chocante dende a perspectiva actual, pero os propios colonizados xogaron no seu día a inverter os papeis, "filmando a quen os filmaba dende unha actitude humorística".

Para reunir a visión do cinema etnográfico co humor, a mostra vai contar coa presenza de Laila Pakalnina, realizadora letoa que presentará nesta mostra seis das súas pezas e participará nunha conversa co cineasta galego Eloy Domínguez.

Sección oficial

Trece filmes compiten na sección oficial da XX MICE, catro deles estreas en España: A s'Orgalesa de Davide Melis sobre o canto a tenore sardo; Eros, de Rachel Daisy sobre os moteis do amor no Brasil; Kongo de Daiana Araujo e "o ser cubano"; e Le boxeur chacelant do francés Thivolle Lo.

Tamén serán estrea en Galicia Cuerpos en tránsito de Mario Moreno arredor da reconstrución das masculinidades, Silence of reason de Kumjana Novakova sobre torturas e violacións padecidas polas mulleres na guerra de Bosnia, Togoland projections, de Jürgen Ellinghaus, A savana e a montanha de Paulo Carneiro sobre a loita da xente de Covas do Barroso fronte a Savannah Resources e Tão pequeninas, tinham o ar de serem já crestidas, de Tânia Dinis.

Na sección oficial concursan tamén catro producións galegas, candidatas ao Premio MICE ao mellor filme etnográfico galego: Resonancias, de Diana Gonçalves; Aurora, de Area Erina; Memoria de Soutelo, de Xoán Bregua; e Corre o vento, de Paula Fuentes e Guillermo Cabrera. Todos os filmes optan ademais aos premios CREA e ao do Público.

'O carro e o home'

A presentación oficial desta vixésima edición da MICE tivo lugar este xoves no Museo do Pobo Galego. Nela interviron representantes de todas as entidades colaboradoras, coma Jacobo Sutil, director da Agadic -Axencia Galega de Industrias Culturais-; a deputada de Cultura, Natividade González; a concelleira de Capital cultural, Míriam Louzao; a presidenta do Padroado do museo, Concha Losada; e a directora da mostra, Ana Estévez. Esta última fixo especial referencia á obra O carro e o home, de Xaquín Lorenzo Xocas. Obra directamente vencellada co nacemento da MICE e "un dos focos fundamentais desta edición".

Tal é a importancia do filme e do legado de Xocas para o cinema galego e o cinema etcnográfico de Galicia que tamén é a inspiración da produción audiovisual do museo para esta edición da mostra. Unha obra breve que se une á imaxe gráfica desta edición e que creou Mirian Opazo, artista visual que tamén asistiu á presentación da XX MICE e que compuxo imaxes do filme de Xocas, con imaxes dun carro abandonado e con música de fondo "en bruto, case sen tocar" dunha lata, unha tixola e o son do carro.

A artista explicou que Xocas é "un dos tres referentes básicos do cinema galego, di ao remate de O carro e o home que o carro non é coma o resto de trebellos do campo cando se abandona, senón que queda mirando o paso do tempo".

As outras seccións

Coma cada ano este MICE trae a sección Impropias, dedicada especificamente ao cinema realizado ou producido por mulleres; Trazas, en colaboración co Cineclube de Compostela; e Lindes. Sección esta última que trata dos límites, fronteirizos ou de xénero cinematográfico, na que se preestrea a primeira longametraxe do ourensán Emilio Fonseca, Salvaxe, salvaxe. Olladas alén do humano.

Tamén haberá actividades formativas para profesionais e escolares. Unha delas o 4 de abril, Xornada de cine e educación. A experiencia de Galicia e Portugal, que terá lugar no Consello da Cultura Galega. E tamén nese mes, pero desta volta no Museo do Pobo, proxectaranse as pezas resultantes de MICEscola, na que participa o alumnado do IES de Oroso, de Cacheiras (Teo) e do CPI Plurilingüe Cernadas de Castro, de Lousame.

Non vai faltar tampouco MICE Petís, con proxeccións para escolares de primaria, secundaria e bacharelato entre o 12 e o 14 de marzo. Estas e o resto das proxeccións son gratuítas e xa están dispoñibles na web do festival.