Rosón avisa da «falta de avances» no proxecto da plataforma loxística de Santiago

A concelleira socialista Mercedes Rosón interpelará á alcaldesa compostelá Goretti Sanmartín no pleno deste xoves ante a «falta de avances» que advirte no proxecto da plataforma loxística, que está concibido para mudar a distribución de mercadorías na zona vella. Rosón remarca que permanece «paralizada» a definición do modelo de xestión que permitiría a posta en marcha da plataforma e acusa á alcaldesa de amosar «pouca valentía á hora de encarar a revolución do reparto de mercadorías no casco histórico».

Un proxecto clave para o casco histórico: Raxoi dá luz verde á urbanización do centro loxístico

Interpelación de Rosón

A interpelación que formulará a concelleira do PSOE inclúe sete preguntas que van desde coñecer os prazos para a finalización das obras de construción ata os avances nas conversacións con Mercasa á hora de coordinar a súa posta en marcha. Rosón quere saber ademais se desde o goberno local se vai apostar por un modelo público, no que a flota de automóbiles sexa de titularidade pública, un sistema concesional ou un plan privado no que as propias empresas distribuidoras adquiran eses vehículos.

Mercagalicia: a plataforma loxística de Compostela é a meta a curto prazo da nova xerencia

Rosón pregúntase como pode ser que, se a estación vai estar operativa a finais do 2025, non exista aínda previsión coñecida para a súa entrada en funcionamento. Critica que o proxecto avanza «a marchas forzadas» a pesar, di, de que «os fondos xa estaban conseguidos desde o 2022, por parte do noso convenio, e a pesar incluso que o convenio entre Concello, Consorcio e Mercasa tamén estaba asinado polo anterior alcalde», o socialista Sánchez Bugallo.

Pasos pendentes

«A señora Sanmartín chegou cos fondos europeos conseguidos, o convenio con Mercasa e Consorcio asinado e o proxecto en marcha, absolutamente todo estaba feito xa e nin tan sequera foron quen de definir o modelo de xestión para comezar a facer todos os traballos complementarios», critica a edil socialista.

Verea exige explicaciones a Raxoi sobre el funcionamiento de la plataforma logística

Mercedes Rosón destaca que «queda por diante definir o modelo e, con iso, elaborar e aprobar unha normativa e, quen sabe, licitar unha concesión». Con todos estes pasos pendentes, considera que «o que falta na ecuación é planificación e valentía» por parte do executivo local.