A Casa das Mulleres Xohana Torres incorpora o asesoramento LGTBIQ+

A alcaldesa de Santiago, Goretti Sanmartín, presentou este martes detalles da adxudicación do servizo e asistencia técnica para a coordinación da Casa das Mulleres Xohana Torres e do servizo de asesoramento LGBTIQ+ que vai asumir agora esta entidade. 

A rexedora, acompañada da directora do CIM –Centro de Información ás Mulleres–, Teresa Furelos, destacou que este equipamento se sitúa como espazo de referencia, con programación e atención regular para dar resposta ás demandas das entidades feministas e LGTBIQ+. Como principais novidades, o centro prestará atención presencial e en remoto en horario de 9 a 19 horas, ademais de contar con servizo de asesoramento LGBTIQ+.

Especialistas en igualdade e LGTBIQ+ para impulsar a Casa Xohana Torres de Santiago

A xunta de goberno local aprobou a adxudicación do contrato de servizo e asistencia técnica para a coordinación da Casa das Mulleres Xohana Torres á empresa Deloga –Desenvolvemento Local Galego–, por un importe de 142.230 euros e para unha duración de dous anos.

«Culminamos así o proceso de licitación co que apostamos por converter a Casa Xohana Torres nun espazo de referencia, con programación e atención regular, que incorpore entre os seus servizos o asesoramento LGBTI, un compromiso político que adquiriu este Goberno recollendo así unha das demandas do movemento asociativo LGBTI do noso concello», explicou a rexedora.

A Casa Xohana Torres vai estar agora xestionada por un equipo multidisciplinar formado por seis perfís profesionais: unha coordinadora xeral, unha persoa especialista en políticas de xénero, unha de comunicación e unha educadora social. Para a atención específica do Servizo de Asesoramento LGBTI, vaise contar con servizo de asesoría xurídica e psicoloxía e todos os perfís profesionais que se incorporen á casa deberán ter formación específica en igualdade.