Mercedes Rosón pide abordar "urxentemente" a expropiación forzosa de Sargadelos

Tralo anuncio do cese da actividade da planta que Sargadelos ten en Cervo (Lugo), xorden desde Santiago as primeiras voces que reclaman abordar “urxentemente” a expropiación forzosa da mesma.

A segunda morte anunciada de Sargadelos

Así, e desde o Grupo Municipal Socialista, Mercedes Rosón asegura que este tema, aínda que transcende o debate local, é unha "cuestión de país na que a capital de Galicia ten que amosar un posicionamento claro" e, especialmente, segundo recalcou, “cando o xerme de todo o enorme legado artístico e cultural de Isaac Díaz Pardo, que supón Sargadelos, tivo a súa orixe no obradoiro da rúa das Hortas do seu pai”.

"É aquí onde comezou a escribirse a historia do brillante e polifacético Díaz Pardo e, tamén desde aquí, debemos alzar a voz para esicirlle ao gobermo galego que actúe", asegurou a edil socialista.

Segundo informan os socialistas nun comunicado, a moción que presentarán aspira a converterse en declaración institucional, polo que Rosón anima ao resto de forzas políticas con presenza en Raxoi a sumarse á iniciativa coa que insta ao executivo galego a servirse da lei de expropiación forzosa para garantir a continuidade da fábrica.

BIC no 2014

Unha expropiación que, segundo insisten os socialistas, está fundamentada "no interese social e a utilidade pública" que esixe a propia normativa. Poñendo o foco no recoñecemento que a fábrica de Cervo ostenta como Ben de Interés Cultural (BIC) dende o 2014, Rosón sérvese de devandita declaración para potenciar a súa proposta.

Segundo recordan os socialistas, no propio texto da declaración abúndase na importancia da actividade industrial e da necesidade de que "calquera figura de protección garanta o seu desenvolvemento normal e mesmo posibilite o seu crecemento e ampliación sustentable dentro dunhas adecuadas condicións para a conservación dos seus valores culturais”.

Fundamental na historia galega

A edil socialista recalcou ademais que a continuidade da fábrica supón tamén preservar “parte importante da historia de Galicia e de Compostela”, poñendo en valor non só a riqueza patrimonial, senón tamén no patrimonio inmaterial “que supón e representa para o noso país”.

Neste senso, Rosón reclama á Xunta de Galicia que lidere o proceso, pedindo tamén a implicación do goberno do Estado e, en especial, do Ministerio de Cultura e Turismo.