Numax celebra os 30 anos de cine do director Alfonso Zarauza e o seu vínculo con Santiago

O Cinema Numax acolle unha completa retrospectiva dos 30 anos de carreira de Alfonso Zarauza, director e produtor fundamental no cinema galego contemporáneo cuxa obra está estreitamente vinculada coa cidade de Santiago. O ciclo arrancará o sábado 26 de abril co filme A noite que deixou de chover, presentado por Miguel de Lira e o propio Zarauza. As entradas para esta sesión e todas as do ciclo xa están á venda.

Estas son las 3 salas en Santiago de Compostela con cine barato para los mayores

En 1994 un mozo de 21 anos daba os seus primeiros pasos na dirección de cinema coa súa primeira curtametraxe protagonizada por outro mozo, prometedor actor, que contaba con 23. O cineasta respondía ao nome de Alfonso Zarauza e o actor ao de Luis Tosar, a curta titulábase Hay que joderse e tivo a súa estrea nos cines Valle Inclán en febreiro de 1995. «Trinta anos e moitas películas despois chega o momento de botar a vista atrás e celebrar estas tres décadas de cinema nas que Alfonso Zarauza retratou as vidas da xente de Compostela en obras moi variadas en canto a formatos, linguaxes e duracións», explican desde Numax.

Retrospectiva completa

«No Cinema Numax estamos moi felices de acoller unha retrospectiva case completa pola obra do noso querido Zarauza, cun programa que arranca o sábado 26 de abril cun evento moi especial no que reestreamos A noite que deixou de chover, peza clave da súa filmografía, dirixida en 2008 e protagonizada polo propio Tosar xunto a Miguel de Lira. Precisamente o actor carnotán, acompañado de Zarauza, ofrecerán a presentación e coloquio desta sesión na que tamén se vai proxectar a curta A danza de Katiuska (1998), protagonizada por Ursia Gago e Luis Tosar.

A continuación, de martes en martes até finais de maio, a sala de cinema programará todas as longametraxes do director compostelán, acompañadas de numerosas curtas que nestes 30 anos «completaron unha obra creativa e poliédrica coa que tamén viaxaremos polas últimas tres décadas da cidade». 

Cada sesión irá, ademais, acompañada de numerosas persoas convidadas, actores e actrices que canda Zarauza rememorarán os procesos creativos das súas obras.