Un Pombal máis «humanizado» reabre á circulación tras «8 meses e 2 días» en obras

Despois de oito meses «e dous días» o Goberno local recepcionaba o venres o remate da obra de humanización da rúa do Pombal, que este luns abría á circulación de vehículos e peóns. Unhas actuacións que melloraron a iluminación e as canalizacións, que ampliaron as beirarrúas e as fixeron máis accesibles situándoas ao mesmo nivel do pavimento e que inclúen ademais un carril bici no sentido de subida. Sobre a reapertura da rúa falaba en rolda de prensa a concelleira de Capital cultural, Míriam Louzao, que lembraba que as actuacións –cun prazo de execución de oito meses– contaron cun orzamento superior aos 760.000 euros.

A ‘inminente’ apertura da rúa do Pombal

Queda agora pendente que se incorporen á circulación pola rúa do Pombal os autobuses urbanos que, segundo informaba a concelleira Louzao, o farán a vindeira semana. «Unha vez que se fixo a recepción da obra», explicaba a edil, o Goberno local decidiu «abrir xa» á circulación pero «os autobuses necesitan un tempo para poder actualizar tamén a aplicación» e facer outras cuestións técnicas necesarias –coma o reordenamento das liñas– nas que está a traballar Tussa. «Podiamos esperar a abrir a rúa tanto para os autobuses coma para os coches particulares, conxuntamente, pero xa que se podía abrir para os vehículos optamos por poder abrila xa», matizou Louzao.

A concelleira aproveitou a súa intervención para explicar que se van realizar na parte alta da rúa outros traballos «de mellora da accesibilidade», que consisten en rebaixar a beirarrúa xa que no estado actual xera problemas de accesibilidade para a veciñanza con dificultades de mobilidade. «Como xa explicamos, estáse preparando unha intervención na zona adxacente que non estaba incluída no ámbito da obra, para ir completando os itinerarios accesibles e continuar acondicionando toda a zona». Uns traballos que dependen de resolver primeiro cuestións vinculadas coas recollida de augas pluviais.

A valoración da veciñanza

Logo de ‘padecer’ oito meses de obras, que sempre xeran algún tipo de inconvinte para a veciñanza da cotorna, os composteláns que na chuviosa mañá do luns se atreveron a ‘estrear’ a nova rúa do Pombal valoraban, de forma maioritaria, dun maneira positiva o resultado das actuacións. 

«Queremos que as obras se inicien e rematen xa», explicaba unha veciña, «e iso non é posible, pero a rúa quedou moito mellor, cunha maior calidade, máis humanizada e primando o espazo dos peóns fronte ao dos coches». Sobre estes últimos tamén algún transeúnte explicaba que «aínda non probei a rúa» como condutor, para poder facer unha valoración máis completa pero si concordaba coa idea de que a rúa presenta un moito mellor aspecto.

Hablan los vecinos sobre las obras en el Pombal: "Lo importante es que se haga bien una vez y no mal veinte veces"

As críticas, que tamén as houbo, e das que non puido escapar o tempo que a rúa estivo cortada ao tráfico, centrábanse na falta de máis detalles de humanización, «algunha árbore estaría ben», comentaba unha veciña do Pombal, e tamén outro transeúnte habitual desta rúa central da cidade criticaba a colocación de bancos na beirarrúa, de costas á área de circulación de coches. «Quedan moi bonitos, pero se algún condutor ten algún problema e perde o control do vehículo vai haber un desgusto», alertaba. Tampouco escapou ás críticas o carril bici, para quen gustaba máis de baixar pola marxe esquerda do Pombal.

Con todo, a proba de lume da humanizada rúa do Pombal chegará cando a vida volva ao cotián, logo da Semana Santa, coa incorporación do tráfico de autobuses, a volta ao colexio e, en termos xerais, ás actividades do día a día.

460.000 euros para rehabilitar firmes en cinco puntos da contorna urbana

A xunta de goberno local aprobou este luns o expediente para a contratación, «mediante procedemento aberto simplificado», das obras de rehabilitación de firmes asfálticos. 

A concelleira de Capital cultural, Míriam Louzao, explicou que se van realizar estas actuacións en cinco puntos do ámbito urbano: rúa do Castiñeiriño, das Canteiras do Sar e Mouronzón, nas rúas da Muíña e Porto de Amio e Mariñeira, na rúa das Mulas, na do Tambre e na dos Irmandiños.

Estas obras de rehabilitación dos firmes asfálticos contan cun orzamento base de 460.004 euros (IVE incluído) e vaise actuar sobre 23.300 metros cadrados de superficie asfaltada. 

Segundo explicou a concelleira e voceira do Goberno local, «os criterios de adxudicación destas obras son obxectivos e atribúen o 80% da valoración á oferta económica e o 20% a tres melloras que poidan propoñer as empresas concursantes en relación co obxecto do contrato». Ademais, o prazo para executar as rehabilitacións asfálticas, unha vez licitada a obra, é de catro meses desde que estea asinada a acta de implantación.