Día das rapazas TIC: promover o traballo tecnolóxico nas escolas

O Colexio Profesional de Enxeñaría en Informática de Galicia (CPEIG) organiza xunto ao Centro de Supercomputación de Galicia (Cesga) e á Secretaría Xeral de Igualdade a XIII edición do Día Internacional das Rapazas nas TIC (International Girls in ICT Day), unha actividade destinada a motivar as novas xeracións de mozas para que consideren o ámbito das tecnoloxías para o seu desenvolvemento académico, investigador e profesional.

O evento vaise celebrar o vindeiro xoves, 24 de abril, de 11 a 13.30 horas na sede do Cesga (avenida de Vigo, no Campus Vida). O acto será inaugurado pola directora da Gain (Axencia Galega de Innovación) e presidenta do Cesga, Carmen Cotelo; a directora Xeral de Promoción da Igualdade da Xunta, María Quintiana; eo presidente do CPEIG, Fernando Suárez. 

A actividade, destinada ao alumnado de primaria e secundaria, vai consistir nunha charla que se retransmitirá en streaming e na que participarán profesionais galegas que contarán a súa traxectoria e o que a tecnoloxía pode achegar en diversos campos para mellorar a vida. Haberá tamén unha mesa redonda, moderada pola coordinadora da área e-learning do Cesga, María José R. Malmierca, xunto a catro destacadas tecnólogas que traballan e investigan en ámbitos relacionados coas novas tecnoloxías: Marta Losada, técnica do Cesga e do proxecto de QuantumSpain; Yolanda Blanco, enxeñeira de Telecomunicacións; Nadezhda Lucía Techera, estudante do grao en Enxeñería Aeroespacial na UVigo; e Alejandra Lugilde, especializada en Intelixencia Artificial.

Unha vintena de centros escolares inscritos participarán na xornada con máis de medio millar de estudantes que poderán enviar preguntas e inquedanzas en directo para poder ter ese diálogo directo coas tecnólogas invitadas. Tamén de forma presencial e ao remate do coloquio, as estudantes presentes realizarán unha visita guiada ás instalacións do Cesga para coñecer o superordenador Finis Terrae III e o ordenador cuántico galego Qmio.