Correlingua: orgullo de ser galegofalantes

A «capital do país» encheuse este xoves de «orgullo de ser galego», porque «o peor galego é o que non se fala», como proclamou dende o palco da música da Alameda compostelá a actriz Isabel Risco, mestra de cerimonias da entrega de premios do Correlingua 2025. Nesta edición, a vixésimo quinta e baixo o lema «A mocidade activa, por unha lingua viva», a festa-competición a prol da lingua galega culminou con premios para catro centros santiagueses, entre eles o colexio de educación especial da Barcia.

Correlingua: orgullo de ser galegofalantes

Ver galería

Os máximos galardóns leváronos o IES Xelmírez I, pola mellor pancarta, e mais o Maruxa Mallo de Ordes, pola mellor animación, da que ademais deron boa conta cos seus tambores ao subiren a recoller o diploma que acredita que foron os máis barulleiros e divertidos da convocatoria compostelá –pois o Correlingua celébrase tamén noutras cidades galegas–. Por detrás do Xelmírez I foron premiados tamén polas súas pancartas o CEIP Apóstolo Santiago e o IES Xulián Magariños, de Negreira. Na categoría de animación, por detrás do Maruxa Mallo, foron premiados o CPI Ponte Carreira, de Frades, e outro centro compostelán, o CEIP Monte dos Postes.

Máis de mil rapaces reivindican en Santiago o uso do galego

«Parabéns a todos vós, a todos os centros de ensino, a todo o alumnado e a todo o profesorado, parabéns e agradecemento infinito pola vosa implicación», berrou dende o palco Isabel Risco, antes de dar a coñecer os centros recoñecidos polas súas iniciativas para engadir tamén que «sempre é moi complicado decidir quen leva os premios, así que parabéns a todas, merecedes unha homenaxe».

E coma homenaxeados parecían sentirse todos os cativos e mozos aínda que non fosen recoñecidos con premios os seus traballos. Así foi no caso do alumnado centro de ensino de Zas, que marchou sen galardón pero deu boa mostra do seu bo talante e da súa querenza en favor da lingua galega: todos levaban pequenas pancartas coa realizadas por eles mesmos, coa bandeira galega por un lado e a súa palabra favorita do galego polo outro, «Quérote» ou «Agasallo» foron algunha delas.

Co alumnado e cos seus mestres e profesores, estiveron ademais de Isabel Risco, o presidente da Mesa pola Normalización, Marcos Maceira, a edil popular Olaya Otero e a concelleira de Deportes e Festas, Pilar Lueiro.