O PP de Santiago reclama o reforzo de persoal no Centro de Información á Muller

Borja Rubio, concelleiro do Partido Popular na capital galega, vén de alertar da "necesidade urxente" de reforzar o Centro de Información á Muller (CIM) de Santiago, «posto que, neste momento, non conta coa suficiente dotación e precisa reforzos inmediatos co fin de garantir unha atención integral ás mulleres», indicou.

«Estamos ante un servizo esencial na loita contra as violencias machistas e na atención integral ás mulleres, e o servizo continúa sen contar cun equipo técnico suficiente para atender a demanda crecente da cidadanía», engadiu o edil popular.

Rubio subliñou que «as profesionais do CIM realizan un traballo exemplar e comprometido», pero advirte que «sen unha aposta decidida por parte do goberno nacionalista, o servizo non pode ofrecer a atención que as mulleres compostelás merecen neste momento». «Temos un goberno que presume de compromiso coa igualdade, pero mantén un dos seus principais servizos sen reforzos reais nin planificación a medio prazo», sinalou.

O concelleiro do PP afirmou que «é necesario pasar das declaracións simbólicas a políticas públicas reais que garantan recursos humanos estables e suficientes, xa que a igualdade non se defende con pancartas ou actos institucionais, senón con profesionais ben atendidas, equipos completos e servizos que funcionen con estabilidade».

Aposta por un plan de coidado e apoio emocional

«Ante esta situación, o Partido Popular de Santiago propón a contratación inmediata dunha educadora social que complemente o traballo xurídico e psicolóxico do CIM, así como o reforzo do equipo de atención psicolóxica con, polo menos, unha nova profesional a tempo completo, manifestou Rubio, ao tempo que indicou que «considera imprescindible a creación dun plan de coidado e apoio emocional, dirixido ao persoal técnico do centro, co obxectivo de garantir o seu benestar e evitar situacións de desgaste».

O concelleiro popular reiterou que «se queremos, de verdade, unha cidade comprometida coa igualdade, entón temos que demostrar iso dotando ben os servizos que fan posible esa igualdade, pero, neste momento, o Concello non o está a facer».