Á espera de avances no Parque de Bombeiros

O concelleiro Xan Duro, responsable de Mobilidade, respondeu este venres a preguntas da prensa en relación co Parque Comarcal de Bombeiros. Segundo explicou o edil a última xuntanza coa Deputación da Coruña tivo lugar nos últimos días e agárdanse noticias para as vindeiras semanas. Trátase de coñecer o posicionamento do órgano provincial en relación coa proposta municipal de avanzar no convenio de servizos do parque sen agardar a dispor do novo edificio.

Optimismo en Santiago con el parque comarcal de bomberos: "Imos conseguilo"

 «É certo que temos que desenvolver o proxecto para a construción do novo edificio, que está a piques de saír a licitación, pero isto non é óbice ou non debe frear todo o proceso», explicou Xan Duro para incidir en que «xa dixemos que non necesitamos un edificio novo para comezar a funcionar como parque comarcal, pois as dependencias que temos actualmente son suficientes coa dotación que temos de material».

O concelleiro insistiu en que «a construción das novas instalacións vén motivada porque pode ser que o servizo medre e porque as obras do edificio da Xunta –en San Caetano– obrigaron a deixar as dependencias», de Rodríguez de Viguri. Pero así e todo aclarou unha vez máis que servizos e novo edificio son cuestións dependentes de «dous convenios independentes aínda que estean vinculados entre si». Con todo o edil confía na resposta afirmativa da Deputación da Coruña á proposta municipal e amósase satisfeito con como se avanza «logo de tantos anos» en que o Parque Comarcal de Bombeiros sexa unha realidade.