Muíños alerta do risco económico para o Concello polo cambio de modelo no transporte urbano

O concelleiro non adscrito Gonzalo Muíños advertiu este luns do “risco económico e financeiro” que, ao seu xuízo, supón para o Concello o cambio de modelo na xestión do transporte urbano anunciado polo goberno local. A modificación supón pasar dun sistema de concesión a un contrato de servizos, no que o Concello asumiría directamente o custo do servizo independentemente dos ingresos por tarifas.

Segundo explicou Muíños, este novo modelo implica que o operador —a empresa adxudicataria— reciba unha remuneración fixa ou variable en función de parámetros como os quilómetros realizados, pero sen asumir o risco de ingresos. “O risco operacional recae integramente no Concello”, advertiu, e iso podería comprometer a sustentabilidade financeira municipal.

Nunha reunión mantida este luns coas concelleiras non adscritas Mercedes Rosón, Mila Castro e Marta Álvarez, Muíños insistiu en que, aínda que non se opoñen frontalmente ao novo modelo, esixirán acceso á documentación económica que o sustenta. En concreto, solicitarán o informe de viabilidade económico-financeira do novo contrato.

“É certo que este sistema podería supor máis control sobre tarifas ou horarios, pero require tamén dunha estrutura administrativa máis robusta que poida supervisar adecuadamente o contrato”, advertiu. Ademais, puxo en dúbida a capacidade do modelo para afrontar situacións excepcionais, como a vivida durante a pandemia: “Durante a Covid, mantivemos o servizo grazas ao esforzo compartido entre o Concello e a empresa concesionaria. Non está claro se algo así sería posible cun contrato de servizos”.

Muíños formulará estas cuestións no pleno municipal de mañá martes, a través dunha pregunta rexistrada previamente sobre o estado da elaboración dos pregos do novo contrato. A pesar do anuncio feito polo goberno local este luns, considera que “os avances reais son relativos”, pois “seguen sen concretar prazos nin horizonte claro para a finalización do proceso”.