Verea esixe dimisións polo "borrón e conta nova" do contrato de autobuses en Santiago

O líder do Partido Popular de Santiago, Borja Verea, lanzou duras críticas ao goberno local durante o Pleno municipal deste martes, tras o anuncio de que o contrato do transporte urbano da cidade reiniciarase desde cero. “Dez anos de desculpas, dez anos de incompetencia, mentres os santiagueses sufrimos os peores autobuses de España”, denunciou o popular, que responsabilizou directamente o tripartito formado por BNG, Compostela Aberta e PSOE da paralización do servizo.

Marxe de manobra e máis custos: Raxoi muda de concesión a servizos o contrato de buses

Verea sinalou de forma particular ao concelleiro Xan Duro, quen foi responsable do contrato entre 2015 e 2019, e volveu asumir competencias nesta área nos dous últimos anos. “No peor dos casos, 10 anos; no mellor dos casos, 6 anos sendo o responsable político directo dos autobuses desta cidade”, lembrou o portavoz popular.

Nunha intervención cargada de reproches, acusou a Duro de non ter cumprido coa súa función: “Gran parte do soldo que lle pagaron os santiagueses durante estes 6 anos era para que trouxese a esta cidade autobuses novos, e non o fixo. O único que fixo onte foi un borrón e conta nova”.

Para Verea, a única saída digna é a renuncia: “Dígollo con total sinceridade e co aprecio persoal que lle teño, loxicamente non político: vostede onte tiña que terlle pedido desculpas aos santiagueses, asumir a culpa por estes 6 anos de retraso e marchar para a casa. Recoñecer que o cargo lle quedou grande, que non ten a pericia, o coñecemento ou as ganas, o que sexa, pero que se equivocou”.

O portavoz popular asegurou que “a dignidade política só tiña onte como único camiño a porta de saída, unha dimisión honrosa que non o fixo, e eu síntoo por vostede”.

Desunión no goberno

Verea tamén criticou a situación de desunión dentro do propio goberno local, logo de que o concelleiro non adscrito Gonzalo Muiños anunciase que non apoiaría un “pago irregular de 500.000 euros para o aluguer de autobuses”. “Isto non é un goberno, aquí non hai gobernabilidade, isto é un circo que dirixe vostede —en referencia á alcaldesa Goretti Sanmartín— e que nin sequera os seus socios de goberno son quen de aprobarlles as súas propias trapalladas”.

Con todo, o PP deixa clara a súa postura: “Non conten con nós para limpar este auténtico desgoberno. Poña orde no seu pacto de gobernabilidade e poña a cidade a funcionar”, concluíu Verea.