Finais de agosto: o horizonte para comezar coa reurbanización de García Lorca

O concelleiro de Obras, Xesús Domínguez, deu conta este martes da adxudicación a Marconsa (Movimientos de Áridos y Construcciones de Arosa)  das obras de reurbanización da rúa García Lorca, no barrio da Guadalupe. Unhas actuacións que darán inicio, previsiblemente, a finais do mes de agosto e que teñen un prazo de execución de 16 meses e un orzamento de 1.082.727 euros.

O edil deu conta da aprobación desta adxudicación por parte da xunta de goberno local celebrada o 30 de xuño e rememorou os avatares padecidos nesta licitación "especialmente necesaria nun barrio que está case igual dende a súa creación" na década dos anos 70. A obra fora xa aprobada en outubro de 2022 pero "con prezos desfasados" o que obrigou a reformular o proxecto para actualizalos, co que o novo plan non se aprobou até dous anos despois. 

Agora, tres anos máis tarde da primeira adxudicación acometeranse unhas obras que permitan, segundo explicou Xesús Domínguez, "recuperar espazo público accesible e seguro para a vida do día a día" da veciñanza deste barrio. Na rúa García Lorca vanse manter os dous sentidos da circulación mais vaise engadir carril bici, tamén en ambos sentidos, e vaise mellorar o itinerario peonil dándolle, entre outras cousas, unha continuidade da que agora carece.

Actuacións na praza Celso Emilio Ferreiro

A reurbanización da rúa García Lorca contempla tamén actuacións de mellora da accesibilidade e reordenamento do aparcadoiro na praza Celso Emilio Ferreiro. Segundo explicou o concelleiro de Obras, unha das demandas da veciñanza é que non se supriman prazas de estacionamento, ao tratarse dun barrio cuxas edificacións, dos anos 70, carecen de garaxes. "Agora a praza está ocupada nun 80% por vehículos", comentou Domínguez, e a actuación consistirá en "reordenar e manter esas prazas de aparcamento, xa que hai déficit de prazas".

Ao tempo que se fai esta reordenación recuperaranse espazos verdes e daráselle continuidade ao itinerario peonil tamén con pasos de peón elevados "para pacificar o tráfico" na zona.

Seguemento das obras de accesibilidade

O Concello de Santiago está a actuar en 14 puntos da cidade para mellorar a súa accesibilidade. Unhas obras xa desenvolvidas en rúas coma as do Avío, Irmandiños e Betanzos. A próxima semana está previsto que comecen as actuacións na conexión de Quiroga Palacios coa Costa do Veedor. Segundo o edil Xesús Domínguez estas obras van sobre a planificación prevista.

O concelleiro indicou que tamén se está a traballar en Alfredo Brañas, cuxo pavimento (de lousa verde) se ve afectado polo tráfico da zona, tanto de vehículos particulares coma de transporte de carga e descarga. Ademais, para evitar que se estacione na beirarrúa estanse a substituír e incrementar o número de varandas.

Outra das obras que se está a realizar a día de hoxe na cidade afecta á rotonda da avenida Castelao, onde até o 4 de xullo se repara unha tubaxe de auga, polo que en sentido de baixada se está a desviar o tráfico por Ulpiano Villanueva. En dirección de subida non hai afectación do tráfico, mentres o acceso á avenida Burgo das Nacións se debe facer a través da rúa Diego Peláez.