Máis de 250 efectivos da Policía Nacional velarán pola seguridade cidadá nas Festas do Apóstolo

A xunta local de Seguridade reuniuse este martes en Raxoi para «repasar os detalles do dispositivo especial por mor das festas do Apóstolo», que decorrerán entre o 18 de xullo –con pregón a cargo da baloncestista Blanca Millán– até o día 31. Nesta xuntanza presidida pola alcaldesa de Santiago, Goretti Sanmartín, e mais pola subdelegada do Goberno na Coruña, María Rivas, e que contou coa presenza do edil de Convivencia, Xan Duro, decidiuse despregar un operativo de máis de 250 policías nacionais entre o 23 e o 26 de xullo, con especial interese no día grande das celebracións, o 25 de xullo, Día de Galicia.

Santiago refuerza las medidas de seguridad durante las Fiestas del Apóstol

Para velar pola seguridade da cidadanía durante as festas, a subdelegada do Goberno comentou no Salón Verde do Pazo de Raxoi que se tomou a decisión de despregar diferentes unidades da CNP, como aos guías caninos, os Tedax ou a UPR, así como as unidades de drons e antidróns.

O reforzo policial para o 25 de xullo xustifícase tamén por coincidir «cos actos que concentran un maior número de persoas en Santiago», dixo Rivas, non só polas festas senón tamén polas manifestacións convocadas e tamén para garantir este último dereito. Segundo explicou a subdelegada do Goberno, «o reforzo notarase por toda a cidade, tamén nas vías de acceso e na estación intermodal, e podería ser incrementado no caso de ser necesario».

Tanto a alcaldesa, coma a subdelegada coincidiron en destacar a boa coordinación entre Subdelegación do Goberno na Coruña e o departamento que dirixe Xan Duro –Compostela Aberta–, que durante todo o ano manteñen xuntanzas para organizar o traballo conxunto de Policía Nacional e Policía Local na capital de Galicia.

Contra as violencias

Como acontece noutros eventos organizados na cidade e que atraen un importante número de público, compostelán e de fóra da cidade, durante as Festas do Apóstolo volverán estar situados en diferentes lugares da cidade –aqueles nos que se prevé unha maior afluencia de persoas–os Puntos Lila, de información e denuncia de violencias machistas e lgtbifóbicas.

A alcaldesa Sanmartín explicou que «este é un dispositivo no que Santiago xa ten unha ampla experiencia, e no que hai unha perfecta coordinación entre todas as Forzas e Corpos de Seguridade». A rexedora fixo referencia específica ao Punto Lila que se instalará na Alameda entre o 19 e o 31 de xullo, que funcionará nun horario amplo «non só para atender denuncias senón tamén para divulgar información xeral ao respecto da violencia de xénero».

'Fuegos pequeños' para despedir unas grandes fiestas del Apóstol en Santiago

Reivindicación do traxe tradicional galego

Goretti Sanmartín aproveitou a comparecencia para convidar a veciñanza a sumarse á celebración do Día do Traxe, o domingo día 20. «Quero aproveitar para facer un chamamento a que todo o mundo que teña unha prenda, algún elemento do traxe tradicional, saia á rúa», expresou porque «creo que é relevante que haxa persoas que visten con orgullo o noso traxe e queremos facer o que nos pide a Asociación do Traxe Galego: colaborar nese chamamento que fai para conseguir que todo o mundo e saque dos armarios esas pezas das súas avoas, das súas bisavoas, da súa familia».