Santiago rende homenaxe ao filósofo Manuel Regueiro Tenreiro

Seis anos despois do pasamento do profesor Manuel Regueiro Tenreiro, (Perbes, Miño, 1943), a comunidade universitaria e filosófica galega rendirá homenaxe á súa figura cun memorial académico que se celebrará este xoves 23 e venres 24 de outubro de 2025 en Santiago e Lugo, respectivamente. O encontro, aberto ao público, leva por título 'Manuel Regueiro Tenreiro: Filosofía e Lingua' e reunirá destacados especialistas das áreas de filosofía, filoloxía e educación.

A xornada inaugural terá lugar mañá, no Salón de Actos da Facultade de Filosofía da USC. O acto abrirase ás 16.15 horas e incluirá a conferencia inaugural do profesor Helio Carpintero Capell (Catedrático de Psicoloxía na UCM e presidente da Academia de Psicoloxía), titulada Lingua e razón vital. Notas sobre unha lingüística orteguiana en homenaxe a Manuel Regueiro.

Logo desenvolveranse dous paneis temáticos. O primeiro, baixo o título de 'Regueiro e a Filosofía', contará coas intervencións de Marcelino Agís Villaverde, Carlos Baliñas Fernández e Ángel González Fernández. O segundo, 'Regueiro e a Lingua Galega', contará coa participación do Centro Ramón Piñeiro, con Mercedes Brea López, J. Ramón López Vázquez e Isabel González, moderados por Armando Requeixo.

Xa na xornada do venres, o Memorial trasladarase ao Salón de Actos da Facultade de Formación do Profesorado da USC, no Campus de Lugo. As sesións abordarán a dimensión docente e persoal de Regueiro. Nun primeiro panel, 'Regueiro, Profesor' intervirá Jaime Santoalla Varela e Manuela López Besteiro, e estará moderado por Miguel Ángel Martínez Quintanar. No seguinte, 'Regueiro e o Compromiso coa Fe', contará coa intervención de Pedro Rubal Pardeiro, José Huerta e Xesús Ferro Ruibal. O encargado de moderar a conversa será Xulio Xiz.

O evento pecharase coa conferencia de clausura a cargo de Valentín García Gómez, secretario xeral da Lingua da Xunta de Galicia, titulada Regueiro e a lingua hoxe.

O memorial está coordinado por Marcelino Agís Villaverde, do departamento de Filoloxía e Antropoloxía da USC e Miguel Ángel Martínez Quintanar, de Filosofía Moral.

A organización corre a cargo da Sociedad Interuniversitaria de Filosofía de Santiago e Egeria / Brandán Comunicación, coa colaboración da Facultade de Filosofía da USC, a Facultade de Formación do Profesorado da USC e o Centro Ramón Piñeiro, e co patrocinio da Secretaría Xeral da Lingua da Xunta de Galicia.

Traxectoria do catedrático

Manuel Regueiro estudou o ensino secundario en Santiago. Licenciado en Filosofía e Letras na Universidade de Salamanca, doutorouse en Filosofía na Universidade Complutense de Madrid. Foi profesor en Soria, Salamanca, Lugo, Ferrol, Vilalba (instituto do que foi director) e novamente en Lugo. Foi subdirector xeral de Inspección e Reforma Educativa (1988-1989) e director xeral de Política Lingüística (1989-2000). Tamén exerceu como director do Centro Ramón Piñeiro para a Investigación en Humanidades.

Colaborou na publicación dos primeiros libros de texto en lingua galega: Introducción á Filosofía (Galaxia, 1979) e Historia da Filosofía (Galaxia, 1980). Foi fundador e membro do consello asesor da Revista Galega de Ensino.